प्यालिएटिभ केयरसम्बन्धि वृहत प्रशिक्षण कार्यक्रम
२०७४, ६ आश्विन शुक्रबार ११:१३ मा प्रकाशित
ललितपुरको हरिसिद्धिस्थित नेपाल क्यान्सर हस्पिटलमा क्यान्सर बिरामीका लागि गरिने प्यालिएटिभ केयर (स्याहार सुसार) सम्बन्धि तिन दिने बृहत प्रशिक्षण तालिम कार्यक्रमको आयोजना गरिएको छ ।
सो कार्यक्रममा देशभरका निजि तथा सरकारी अस्पताल, मेडिकल कलेज, नर्सिङ कलेजलगायतका स्वास्थ्य संस्थामा कार्यरत नर्सिङ डाइरेक्टर तथा अध्ययन गरिरहेका नर्सिङ छात्राहरु संलग्न रहेका छन् । अन्तर्राष्ट्रिय मापदण्डसम्बन्धि क्यान्सर उपचार पद्धतिलाई व्यवहारमा उतार्ने अभिप्रायले तालिम प्रदान गरिएको अस्पतालका वरिष्ठ क्यान्सर विशेषज्ञ डाक्टर सुदिप श्रेष्ठले बताउनुभयो ।
नेपाल क्यान्सर हस्पिटल र अमेरिकाको इन्ड अफ लाइफ एजुकेशन कन्सर्टियम (इल्नेक) को संयुक्त आयोजनामा सो प्रशिक्षण कार्यक्रमको आयोजना गरिएको हो ।
नेपालजस्तो विकासोन्मुख देशमा क्यान्सरबाट बच्न तथा बचाउन र प्रारम्भिक अवस्थामा नै रोगको पहिचान गर्न छलफल केन्द्रित भएको छ । ग्लोबोक्यान २०१२ को तथ्याङ्ग अनुसार, प्रत्येक बर्ष विश्वभर १ करोड ४१ लाख मानिसलाई क्यान्सर हुने गरेको छ । विकासोन्सोमुख देशहरुमा बर्षेनी ८० लाख क्यान्सरका नयाँ बिरामी फेला पर्छन् भने ५३ लाखले ज्यान गुमाइरहेका छन् । विश्व स्वास्थ्य संघ २०१४ को तथ्याङ्ग अनुसार, नेपालमा बर्षेनी १४ हजार ३ सय जना मानिस क्यान्सरका कारण ज्यान गुमाइरहेका छन् । यसैगरी मुलुकमा १० हजार ६ सय ३४ जनामा नयाँ क्यान्सर फेला पर्ने गरेको छ ।
