डा केसी शीतलहरप्रभावित क्षेत्रमा
२०७४, ५ माघ शुक्रबार ०४:२५ मा प्रकाशित
स्वास्थ्य क्षेत्रमा सुधारको माग गर्दै १४ पटक अनशन बसेका डा गोविन्द केसी मधेसका शीतलहर प्रभावित बिरामीको उपचारका लागि रौतहट आइपुगेका छन् । चिकित्सकसहितको उनको टोलीले गढीमाई नगरपालिका २ समनपुरको प्राथमिक स्वास्थ्य केन्द्रमा २ दिने निस्शुल्क स्वास्थ्य शिविर सुरु गरेको छ ।
शिविरको पहिलो दिन बिहीबार ३५ बिरामीको स्वास्थ्य परीक्षण गरिएको छ । डा केसी आएको सूचना पाएपछि समनपुरका योगी साह सोनार पक्षाघातले थलिएकी ४५ वर्षीया पत्नी उर्मिलादेवी साहलाई ह्वीलचेयरमा लिएर आएका थिए । केसीले करिब १५ मिनेट समय लगाएर उर्मिलाको स्वास्थ्य परीक्षण गरेका थिए । जाडोले काम्दै गरेकी उर्मिलालाई उनले एक थान कम्बल पनि दिएका थिए ।
यस्तै, समनपुरकै ७० वर्षीया मौलादेवी साहलाई पनि केसीले शिविरमै स्वास्थ्य परीक्षण गरेर कम्बल उपलब्ध गराएका थिए । चिकित्सक अभिषेकराज सिंहका अनुसार शिविरमा आएका अधिकांश बिरामीमा उच्च रक्तचाप देखिएको छ । उनले भने, ‘अशिक्षा र गरिबीका कारण अधिकांश बिरामी उपचार नगराई घरमै बस्ने गरेको पाइएको छ ।’ केसीको टोलीलाई प्राथमिक स्वास्थ्य केन्द्र समनपुरका प्रमुख तेजनारायण यादवसहितका स्वास्थ्यकर्मीले सघाएका थिए ।
केसीले घरघरमा पुगेर वृद्धवृद्धा तथा बालबालिकालाई न्यानो कपडा वितरण गरेका थिए । उनले गढीमाईको हरैया, टोकार, समनपुर, लक्ष्मीपुर र सुन्दरपुरका १ सय वृद्धवृद्धा एवं बालबालिकालाई न्यानो कपडा ज्याकेट, टोपी, कम्बल वितरण गरेका थिए ।
कम्बल पाएपछि गढीमाई १ टोकारकी ९० वर्षीया पतियादेवी रामले भनिन्, ‘अब तातोमा सुत्न पाइने भयो ।’ उनले जाडोमा पहिलोपटक कम्बल पाएकी थिइन् । पतियादेवीले अहिलेसम्म वृद्धभत्ता नपाएको गुनासो पनि गरेकी थिइन् । शरीरमा कपडा नभएका विपन्नलाई केसीले आफैं कपडा, कम्बल उपलब्ध गराएका थिए । कान्तिपुर दैनिकबाट
