सातौँ अन्तर्राष्ट्रिय प्रसव फिस्टुला (अब्स्टेट्रिक फिस्टुला) सम्मेलन राजधानीमा सम्पन्न
२०७५, २३ मंसिर आईतवार ०५:३० मा प्रकाशित
“सबैको लागि आशा, उपचार तथा सम्मान” भन्ने नाराका साथ सातौं अन्तर्राष्ट्रिय प्रसव फिस्टुला (अब्स्टेट्रिक फिस्टुला) सम्मेलन भब्यताका साथ राजधानीमा सम्पन्न भएको छ ।
सम्मेलन बुधबारदेखि शनिबारसम्म चलेको थियो । सम्मेलनको आयोजना नेपाल प्रसुति तथा स्त्रीरोग विशेषज्ञ समाज (नेसोग) र अन्तर्राष्ट्रिय प्रसव फिस्टुला शल्य चिकित्सक समाज (आईसफ्स) को संयुक्त आयोजनामा भएको हो ।
वरिष्ठ स्त्रीरोग विशेषज्ञ डा. गणेश दंगालले फिस्टुलाको सम्भावित कारण, जटिलता, रोकथाम, निदान, अभिलेखीकरण तथा उपचार विधि सम्बन्धी जानकारी आदनप्रदान गर्ने उद्देश्यले सम्मलेन आयोजना गरिएको बताउनुभयो ।
५ सय जना सहभागी भएको सम्मेलनमा राष्ट्रिय तथा अन्तर्राष्ट्रिय सहभागीबाट करीब १ सय ५० वटा शोधपत्रहरु प्रस्तुत गरिएको थियो । त्यसैगरी फिस्टुलासम्बन्धी ४० भन्दा बढी सूचना सामाग्रीहरु प्रस्तुत गरिएको आयोजकले जनाएको छ ।
फिस्टुलाबाट पिडित महिलाहरुको स्वस्थ्य जीवपनयापन गर्न पाउने अधिकार सुनिश्चित गर्ने उद्धेश्य सहित यस समस्या समाधानको लागि भइरहेको सेवा, कार्यक्रम तथा कार्यान्वयनलाई यो सम्मलेनले थप सहयोग पु¥याउने आयोजकले जनाएको छ ।
प्रसव फिस्टुला के हो ?
प्रसूतिको बेलामा अथवा शिशु जन्माउने क्रममा लामो समयसम्म ब्यथा लाग्दा आमाको गर्भबाट शिशु सहजै बाहिर निस्कन सक्दैन । यो अवधिमा शिशुको टाउकोले योनीमार्ग, पिसाब थैली वा मलाशयलाई धेरै समय च्याप्छ । यसरी च्यापिएपछि त्यस भागमा रक्तसञ्चार बन्द भएर त्यहाँको मांसपेशी मर्छ । सो स्थानमा प्वाल पर्ने सम्भावना पनि हुन्छ । यस्तो समस्या (प्वाल) पिसाबथैली र योनीमार्गको बीचमा छ भने योनीबाट लगातार पिसाब चुहिन्छ । साथै यस्तो प्वाल योनिमार्ग र दिसाथैलीको बीचमा परेको छ भने योनीबाट दिसा निस्कन्छ वा यो दुबै ठाउँमा परेको भए योनीबाट दिसापिसाब दुबै निस्कन्छ । यसलाई नै प्रसव फिस्टुला भनिन्छ ।
