सातौँ नेपाल फर्मा तथा हेल्थ एक्स्पो चितवनमा शुरु, स्वदेशी औषधिलाई प्राथमिकता दिन आग्रह
२०७५, १७ फाल्गुन शुक्रबार ११:२८ मा प्रकाशित
मरणोपरान्त अंगदानका लागि सामाजिक अभियान सहितको तीन दिने (१७—१९ गते) सातौँ नेपाल फर्मा तथा हेल्थ एक्स्पो चिनवनमा शुरु भएको छ । हरेक दुइवर्षमा हुने एक्स्पो पहिलो पटक उपत्यका बाहिर भएको हो । एक्स्पोमा करिब ५० हजार अवलोकनकर्ताहरुले भ्रमण गर्ने र एक हजार भन्दा बढिले अंगदान गर्ने आशा गरिएको छ । एक्स्पोमा २ सय स्टल रहेका छन् । औषधि क्षेत्रमा नयाँ प्रविधिको खोज गरिरहेका विभिन्न ३० ओटा बहुर्राष्ट्रिय कम्पनि, १ सय २० भारतीय, चिनिया १० कम्पनी एक्पोमा सहभागी रहेका छन् । नीजि क्षेत्रको १० वटा अस्पतालले समेत एक्स्पोमा भाग लिएका छन् । 
एक्स्पोमा विभिन्न टेक्निकल सेमिनारका साथै सञ्चारमाध्यमको सहजताको लागि मिडिया सेन्टरको समेत व्यवस्था गरिएको छ । एक्पोको प्लाटिनम स्पोन्सर प्यासिफिक कमर्सियल कम्पनी प्राइभेट लिमिटेड रहेको छ । यसैगरी डायमण्ड स्पोन्सरमा सन्साई फर्मा र एलम्याक टेक्नोलोजी रहेका छन् । एक्स्पोको गोल्ड स्पोन्सरमा जीएमपी टेक्निकल सोलुसन, एनपीएम मेसिनरी र एजिलेन्ट टेक्नोलोजी प्रुडेन्ट मेडिटेक रहेका छन् ।
नेपाल औषधि उत्पादन संघको आयोजनामा भएको एक्स्पोको उद्योग वाणिज्य तथा आपूर्ति मन्त्री मात्रिका यादवले उद्घाटन गर्नुभयो । उहाँले स्वदेशी औषधिबाट मुलुकलाई आत्मनिर्भरता तर्फ उन्मुख गराउन सरकार र उद्योगीहरुको समन्वय आवश्यक भएको बताउनुभयो । उहाँले भन्नुभयो—‘अनि मात्र मुलुकमा स्वदेशी औषधिले वर्चस्व जमाउन सक्नेछ ।’
यसैगरी औषधि व्यवस्था विभागका महानिर्देशक नारायण ढकालले सरकारको नीति नियम अवलम्बन गर्दै अघि बढ्न स्वदेशी औषधि कम्पनिहरुलाई आग्रह गर्नुभयो । उहाँले स्वदेशी औषधिहरुको विकास र विस्तारमा सबैको हातेमालो आवश्यक भएको बताउनुभयो । सो अवसरमा नेपाल औषधि उत्पादक संघका अध्यक्ष दिपक प्रसाद दाहालले सरकारले सहयोग गरेमा मुलुक स्वदेशी औषधिमा आत्मनिर्भर हुने बताउनुभयो । उहाँले अन्तर्राष्ट्रिय स्तरका औषधिसँग स्वदेशी कम्पनिबाट उत्पादित औषधिहरु सक्षम रहेको जानकारी गराउनुभयो ।
एक्स्पोका संयोजक जि.नारायण बहादुर क्षेत्रीले नेपालमा उत्पादन भइरहेका औषधि उत्पादनका प्रविधि र यसमा अपनाइएका संवेदनशीलताको बारे सचेतना दिने, नेपालको औषधि उत्पादनलाई अन्तर्राष्ट्रिय स्तरसम्म पु¥याउन अझ प्रविधिमैत्री र दक्षता प्रदान गर्ने, औषधि प्राविधिक र फर्मासिस्टहरुलाई अन्तर्राष्ट्रियस्तरको नविन प्राविधिक ज्ञान दिने उद्देश्यले एक्स्पोको आयोजना गरिदै आएको बताउनुभयो । नेपालमा प्रत्येक वर्ष ३५ वटा प्राविधिक कलेजबाट करिब १ हजार ५ सय औषधि प्राविधिक र ५ सयको हाराहारीमा फर्मासिष्ट उत्पादन हुँदै आएका छन् । सचेतनाका लागि आज बिहान चितवनमा औषधि उद्यमीहरुले प्रभातफेरिको समेत आयोजना गरेका छन् । 
यस वर्ष औषधि उत्पादक संघले सामाजिक उत्तरदायित्वलाई आत्मसात गर्दै पहिलो पटक मरणोपरान्त अंगदानको अभियानलाई संस्थागत गर्ने निर्णय अनुरुप भक्तपुरको शहिद धर्मभक्त राष्ट्रिय प्रत्यारोपन केन्द्रसँग सहकार्य गरेको छ । एक्स्पोलाई सफल बनाउन औषधि व्यवस्था विभाग, शहीद धर्मभक्त राष्ट्रिय प्रत्यारोपण केन्द्र, नेपाल औषधि व्यवसायी संघ, नेपाल उद्योग वाणिज्य महासंघ, नेपाल उद्योग परिसंघ, नेपाल फर्मास्युटिकल्स एसोसिएसन र ग्राजुयट फर्मासिष्ट एसोसिएन अफ नेपाल र एसोसिएसन अफ प्राइभेट हेल्थ इन्स्टिच्युएसन अफ नेपाल रहेका छन् । 
