‘उच्च प्राथमिकतामा शुद्ध खानेपानी’
खानेपानी तथा सरसफाइ मन्त्री विना मगरले अहिले कुल जनसंख्यामध्ये २० प्रतिशतले मात्रै प्रशोधित खानेपानी प्राप्त गरेकाले अबको ११ वर्षमा सबै नेपालीले प्रशोधित खानेपानी उपलब्ध गराउने बताउनुभएको छ ।
वर्तमान सरकारले संविधानको मौलिक हकमा व्यवस्थालाई साकार पार्न दिगो विकासको लक्ष्य अनुसार सन् २०३० सम्ममा सबै नेपालीलाई शुद्ध खानेपानी उपलब्ध गराउने प्रतिबद्धता व्यक्त गर्नुभयो ।
काठमाडौं जिल्लाको तारकेश्वर नगरपालिका वडा नं. ४ को घट्टेपाखामा आयोजित खानेपानी ट्यांकीको मंगलबार शिलान्यास गर्नुहुँदै मन्त्री थापाले देशभरिमा ४२ उपभोक्ता समितिले खानेपानीको व्यवस्थापन गर्दै आएको जानकारी दिनुभयो ।
देशका कतिपय स्थानमा अझै पनि १० घण्टा समय लगाएर खानेपानी लिन जानुपर्ने अवस्था रहेको छ भन्दै मन्त्री थापाले विगतमा खानेपानी विभागमार्फत काम हुँदै आएकोमा वर्तमान सरकारले खानेपानीलाई उच्च प्राथमिकतामा राखेर खानेपानी मन्त्रालय नै गठन गरेर काम भइरहेको छ भन्नुभयो ।
प्रदेशसभा सदस्य प्रकाश श्रेष्ठले पानी ट्यांकी निर्माणका लागि प्रदेश सरकारले ५० लाख रुपियाँ बजेट उपलब्ध गराएको र आगामी आर्थिक वर्षमा पाइप विस्तारका लागि थप ५० लाख रुपियाँ उपलब्ध गराउने प्रतिबद्ध व्यक्त गर्नुभयो । उहाँले पाँचमाने खानेपानी योजनाको विस्तृत कार्य विवरण (डिपीआर) तयार भएकाले नयाँ आर्थिक वर्षमा १० देखि १५ करोड रुपियाँ बजेट उपलब्ध गराउने विषयमा संघीय सरकारसँग छलफल भइरहेको जानकारी दिनुभयो । उहाँले पुरानो गुह्येश्वरी बोहराटार सडक खण्डको बाँकी खण्ड पिच गर्न यसै आर्थिक वर्षमा ५० लाख रुपियाँ प्राप्त भएको जानकारी दिनुभयो ।
तारकेश्वर नगरपालिकाका प्रमुख रामेश्वर बोहराले यस नगरमा पानीका स्रोत नबढे पनि जनसंख्या भने १० गुणाले वृद्धि भएको बताउनुभयो । उहाँले काठमाडौं उपत्यका खानेपानी आयोजना (केयुकेएल) ले नगरपालिकाहरुसँग समन्वय नगरी काम गरेको र खानेपानी व्यवस्थापन ज्यादै कमजोर भएकाले धेरै उपभोक्ताले पानीको महसुल मात्रै तिर्नुपरेको गुनासो गर्नुभयो ।
तारकेश्वर वडा नं. ४ का वडा अध्यक्ष नरेन्द्रदास श्रेष्ठले आगामी असार १५ भित्रै निर्माण सम्पन्न गर्ने लक्ष्यका साथ पानी टंकी निर्माण हुने लागेको र यसको क्षमता दुई लाख २० हजार लिटर हुने र वडा नं. ४ र ५ का बासिन्दाले उपभोग गर्ने जानकारी दिनुभयो ।
उहाँका अनुसार, वडा नं. ४ को दर्गुनेपानी, नयाँ गणेश, पुरानो गुह्येश्वरी क्षेत्र हुँदै शेषमती पुल, माछापुच्छ्रेटोल भएर मिलन बस्ती, लोलाड.को तल्लो भाग र वडा नं. ५ को घट्टेपाखा क्षेत्रमा पाइप विस्तार गरिने छ ।
यसैगरी, वडा ५ का वडा अध्यक्ष वासुदेव गौतमले वडा नं. ४ मा पानीका स्रोत कम भएकाले आफ्नो वडामा भएका पानीका स्रोत र थप पानी टंकी निर्माणका लागि आवश्यक पर्ने आठ रोपनी जग्गा उपलब्ध गराउने प्रतिबद्धता जनाउनुभयो ।
गोलढुंगा खानेपानी तथा सरसफाइ समितिका अध्यक्ष सीताराम रेग्मीले छ इन्चको खानेपानीको पाइप शिरबाट गए पनि उपभोक्ताले पानी खान नपाएकोप्रति रोष प्रकट गर्दै सो पानी यहाँका उपभोक्ताले प्रयोग गर्न पाउनुपर्छ भन्नुभयो । सो पानी नेपाली सेना र व्यारेक तथा बालाजु बाइसधारतर्फ ल्याइएको छ ।
सहलगानी बोर्डका प्रमुख प्रदीपकुमारीले मुडभरीले बोर्डले ७० प्रतिशत र उपभोक्ताले ३० प्रतिशत व्यहोर्ने गरी लगानी गर्न तयार रहेको जानकारी दिनुभयो ।
गोलढुंगा खानेपानी समितिले यसअघि नै ७६४ घरमा धारा वितरण गरिसकेको छ भने अब चार हजार पाँच घरका करिब ३७ हजार उपभोक्तालाई शुद्ध खानेपानी उपलब्ध गराइने जनाएको छ । काठमाडौं महानगरपालिकासँग जोडिएको वडा भए पनि घर घरमा पानीको धारा भन्ने योजना बल्ल अगाडि बढेको छ । गोरखापत्रबाट