महिलाको रोजाइमा नर्सिङ
विरामीको उपचारमा दिनरात खटिनुपर्ने नर्सिङ पेशामा महिलाको आकर्षण बढ्दो छ । मुलुक भित्रका स्वास्थ्य संस्था र विदेशमा समेत काम पाइने आशाले यो पेशामा लाग्न चाहने संख्यामा कमी नआएको हो ।
अब भने सरकारी स्वास्थ्य नीतिका कारणले नर्सिङ अध्ययनमा जति आकर्षण बढेको छ त्यति नै बेराजगार बन्नु पर्ने अवस्था आउलाकि भन्ने चिन्ता थपिएको नर्सले बताएका छन् । विरामी उपचारमा कुनै पनि अस्पतालमा भर्ना भएदेखि डिस्चार्ज भएसम्म नर्सको भूमिका रहन्छ । तर नर्सिङ पेशा दिन दिनै धरापमा परेको उनीहरूको भनाइ छ ।
नेपाल नर्सिंङ संघ धरान इकाइद्वारा वीपी कोइराला स्वास्थ्य विज्ञान प्रतिष्ठानमा आयोजित १९९ औं अन्तर्राष्ट्रिय नर्सिङ दिसवको अवसरमा आफ्नो पेशाबारे खुलेर विभिन्न धारणासहित सरकारले गर्नु पर्ने विषयमा राय राख्दै चिन्ता व्यक्त गरे । संघका केन्द्रीय उपाध्यक्ष प्रतिष्ठानको कम्युनिटी हेल्थ नर्सिङ विभागकी प्राध्यापक डा तारा साहले भनिन्, ‘राज्यका निति निर्माण र योजनातर्जुमा तहमा प्राय सवै विषय र क्षेत्रका प्रतिनिधिहरू पुर्याएको छ तर नर्सिङ पेशाको हितमा काम गरिरहेका कसैलाई पनि न कुनै निति नै बनाएको छ न नर्सलाई सरकारले निति निर्माणतहमा नै पुर्याएको छ ।’
नर्सको प्रेरणको श्रोत फ्लोरेन्स नाइटिङ्गेलको जन्मदिनको अवसर पारेर विश्वभर नर्सिङ दिवस मनाइरहेको बेला विरामी उपचारमा महत्वपूर्ण भूमिका खेल्ने नर्सको शसक्तीकरण गर्न सरकारले कुनै ध्यान दिन नसकेको पनि डा साहले बताइन् । संघको तथ्याङमा हाल नेपालमा ८५ हजार नर्सले नर्सिङ काउन्सिलमा दर्ता गरेका छन् ।