औषधी खरिद रोकिएपछि मन्त्रालयको स्पष्टिकरण

नेपाल हेल्थ न्युज, काठमाडौँ,। स्वास्थ्य तथा जनसङ्ख्या मन्त्रालयले नेपाल औषधी लिमिटेड खरिद प्रक्रियामा समावेश नभएका कारणले औषधी खरिद रोकिएको बताएको छ । 

मन्त्रालयका प्रवक्ता डा. प्रकाश बुढाथोकीले स्वास्थ्य मन्त्रालयले औषधी खरिद प्रक्रिया अगाडि नबढाउँदा औषधी लिमिटेडले औषधी उत्पादन बन्द गरेको विषयलाई खण्डन गर्नुभएको हो । उहाँले सार्वजनिक खरिद ऐन र नियमावलीबाट हुने टेन्डर प्रक्रियाहरूमा सहभागी भई कागजातहरू पूरा भएको खण्डमा लिमिटेडले नै टेन्डर पाउने बताउँदै यो किराना पसलबाट सामान किनेजस्तो नभएको टिप्पणी गर्नुभयो । उहाँले मन्त्रालयले आफ्नो घरेलु  स्थानीय उद्योगहरूलाई प्रोत्साहन गर्ने समेत जिकिर गर्नुभयो । 

डा. बुढाथोकीले भन्नुभयो, “हामी आफ्नै घरेलु र स्थानीय उद्योगहरूलाई प्रोत्साहन गर्छौं । उहाँहरूले दिने मूल्य पनि विदेशीहरूको भन्दा सस्तो हुन्छ भन्ने हामीलाई विश्वास लाग्छ । सार्वजनिक खरिद ऐन र नियमावलीबाट हुने टेन्डर प्रक्रियाहरूमा सहभागी भएर कागजात पूरा गर्नुभयो र सुनिश्चितता गर्नुभयो भने उहाँहरूले नै पाउनुहुन्छ त्यसमा दुई मत छैन । त्यसमा समावेश नभएर किराना पसलबाट समान किनेजस्तै भनेपछि यो नभएको हो । मन्त्रालय विधिमा चल्छ । नियम कानुन मानेर चल्छ ।” 

प्रवक्ता डा. बुढाथोकीले औषधी लिमिटेडले जिटुजी सरकारी टु सरकारी काम गर्नका लागि अर्थ मन्त्रालय र उद्योग मन्त्रालयले प्रतिबद्धता व्यक्त गर्नुपर्ने बताउनुहुँदै वर्षभरी कुनै पनि औषधीको उत्पादन नरोकिने विश्वास दिलाउनुपर्ने बताउनुभयो । टेन्डर प्रक्रियामा नजाने र विजनेस प्लान पनि देखाउने जस्ता कामले मन्त्रालयलाई विश्वास नलागेको जिकिर गर्नुभयो ।

नेपाल औषधी लिमिटेडले व्यावसायिक प्लान बनाएर उद्योग मन्त्रालयमार्फत अर्थ मन्त्रालयमा पठाउने र अर्थ मन्त्रालयले स्वीकृति दिएपछि बजेटको पनि सुनिश्चितता हुने मुख्यमन्त्री लगायतको बैठकमा छलफल भएको बताउनुभयो । न्युज एजेन्सी नेपालसँग कुरा गर्नुहुँदै उहाँले अर्थ मन्त्रालयमा औषधी लिमिटेडले पेस गरेको एमओयू स्वीकृत नभएको समेत बताउनुभयो । 

“पछिल्लो समय मुख्यमन्त्री, सचिव लगायतका सरोकारवाला नेतृत्वमा भएको छलफलमा पनि नेपाल औषधी लिमिटेडले व्यावसायिक प्लान बनाएर उद्योग मन्त्रालयमार्फत अर्थ मन्त्रालयमा पठाउने, अर्थ मन्त्रालयले स्वीकृति दियो भने बजेटको पनि सुनिश्चितता गर्छ । त्यो सुनिश्चितताको आधारमा स्वास्थ्य मन्त्रालयले उहाँबाट औषधीहरू किन्ने गरी एमओयू गर्ने गरी तयारी भएको हो ।,’’ उहाँले भन्नुभयो, ‘‘तर अर्थ मन्त्रालयमा उहाँहरूले पेस गरेको एमओयू स्वीकृत पनि भएको छैन । अर्थ मन्त्रालयले प्रत्याभुति पनि नदिएको अवस्थामा स्वास्थ्य मन्त्रालयले तपाईंहरूको बिजनेस प्लान हेरौँ न त भन्दा खेरी नदिएपछि हामीले कुन विश्वासको आधारमा २४ औँ घण्टा, १२ महिना औषधी उत्पादन हुन्छ र त्यो औषधीलाई नेपाली जनताले निःशुल्कको रूपमा वा अन्य रूपमा औषधी पाइरहन्छन् भन्ने विश्वास भएन । त्यो विश्वास नभएकाले पनि एमओयू गर्न ढिलाइ भएको हो ।” 

नेपाल औषधी लिमिटेडले विगत डेढ महिनादेखि सिटामोल र जीवनजल उत्पादन रोकेको छ । कच्चा पदार्थको ठुलो परिमाण खरिद गरेर उत्पादन बढाइए पनि सरकारका विभिन्न निकायहरूले औषधी खरिद नगरेपछि बजारमा बिक्री ठप्प हुँदा उत्पादन नै बन्द गर्नुपरेको औषधी लिमिटेडले जनाएको छ । न्युज एजेन्सी नेपाल