नर्भिकले गर्ने भो जटिल मस्तिष्क रोगी बालकको निःशुल्क उपचार
२०७४, २५ जेष्ठ बिहीबार १२:१६ मा प्रकाशित
काठमाडौंको थापाथलीस्थित नर्भिक इन्टनेशनल हस्पिटलले तीन वर्षदेखि मस्तिष्कसम्बन्धी जटिल रोगबाट पीडित पश्चिम नेपालका एक चार वर्षीय बालकको निःशुल्क उपचार गर्ने भएको छ ।
रोल्पा बुढागाउँ स्थायी घर भई दाङ बस्दै आउनुभएकी राजिता थापाका कान्छा छोरा गौतम थापा ‘होलो प्रोजेनसेफाली’ नामक रोगबाट पीडित भएपछि उपचारका लागि तीन वर्षदेखि काठमाडौँको सडक पेटीमा पैसा मागेर बसिन् । उपचार खर्चको जोहो गर्नमा थिइन् तर सफल भएकी थिइनन् ।
एक वर्षअघि नयाँ सडक निवासी क्षितिजा शाक्यले भेटेपछि राजिताको छोराका लागि उपचारको बाटो खुलेको हो । बाटोमा छोरालाई राखेर पैसा मागिरहेकी राजितालाई देखेपछि उपचार पनि गर्नुपर्छ भन्ने लागेर नर्भिक ल्याएको उनले बताइन् ।
शाक्यको पहलमा नर्भिकले गौतमको सम्पूर्ण उपचार निःशुल्क गर्ने जनाएको छ । सो रोगले शिशुको टाउको र अनुहारको विकासमा बाधा पु¥याउनुका साथै मस्तिष्क आंशिक रूपमा विभाजित भई अन्य कोषको विकासमा समेत बाधा गरिरहेको हुन्छ ।
अस्पताल लगिएका गौतमको अवस्था जाँच गरेपछि न्युरो फिजिसियन पङ्कज जलानले उनलाई होलो प्रोजेनसेफाली नामक जटिल मस्तिष्क रोगमध्येको ‘एलोबार होलो प्रोजेनसेफाली’ भएको पुष्टि गरेका थिए । गौतमको उपचार अस्पतालबाट सम्भव भएको सम्पूर्ण उपचार निःशुल्क गर्ने अस्पतालका कार्यकारी निर्देशक राजेन्द्रबहादुर सिंहले जानकारी दिए ।
चिकित्सकका अनुसार सामान्यतः मुखको कुनै पनि खराबी मस्तिष्क जटिलताको खराबीको आधारमा हुन्छ । अस्पतालका अनुसार ‘एलोबार होलो प्रोजेनसेफाली’ भएका शिशु मरेकै अवस्थामा जन्मने वा जन्मिएको थोरै समयमै मृत्यु हुनसक्छ । समस्याबाट कम प्रभावित शिशुको भने आयु शारीरिक अवस्थामा भर पर्ने हुन्छ । ‘होलो प्रोजेनसेफाली’ हुनुको मुख्य कारण मस्तिष्कमा हुनुपर्ने छुट्टाछुट्टै प्रकोस्टहरू (दाहिने मस्तिष्क र देब्रे मस्तिष्क) मा विभाजित नभएर केबल एउटामात्र मस्तिष्क हुनु मुख्य कारण हो । अस्पतालका अनुसार गौतम भने जन्मजातै असामान्य अवस्थाका छन् । उनको टाउको अत्यधिक ठूलो भएर समस्या भएको छ ।
अस्पतालले निःशुल्क उपचार गर्ने भएपछि राजिताले त्यहाँसम्म आउन सहयोग गर्ने क्षितिजा र अस्पताल प्रशासनलाई धन्यवाद दिनुभयो । गौतमबाहेक अन्य तीन छोराछोरीसँगै हाल बोहराटार, काठमाडौँमा बस्दै आएकी राजिताले बिरामीको उपचारमा सहयोग नगरी श्रीमान्ले दोस्रो विवाह गरी गाउँमै बसेकाले मागेर भए पनि छोराको उपचारका लागि काठमाडौँ आएको बताइन् । रासस
