नर्सिङ काउन्सिलको रिक्त सदस्य पदमा नर्सद्धय सानु तुलाधर र दुर्गालक्ष्मी श्रेष्ठ नियुक्त
२०७६, २४ पुष बिहीबार २१:५३ मा प्रकाशित
जनस्वास्थ्य सरोकार, काठमाडौं । सरकारले नेपाल नर्सिङ काउन्सिलको रिक्त सदस्य पदमा नर्सद्धय सानु तुलाधर र दुर्गालक्ष्मी श्रेष्ठलाई नियुक्त गरेको छ । सोमबार बसेको मन्त्रिपरिषद्को बैठकले तुलाधर र श्रेष्ठलाई काउन्सिलको सदस्य पदमा नियुक्त गरेको हो।
मन्त्रिपरिषदको निर्णय सार्वजनिक गर्न गरिएको सरकारको नियमित पत्रकार सम्मेलनमा सरकारका प्रवक्ता गोकुल बास्कोटाले सो जानकारी दिएका हुन् । स्वास्थ्यमन्त्री भानुभक्त ढकालले सिफारिस गरेको तुलाधर र श्रेष्ठको नाम नियुक्तिका लागि प्रस्ताव गरेका थिए।
मन्त्रालयले तुलाधारलाई क्याम्पस प्रमुख तर्फबाट र श्रेष्ठलाई सरकारी कोटाबाट सिफारिस गरेको थियो।
तुलाधर स्वयंम्भूमा रहेको मोडल कलेजको क्याम्पस प्रमुख हुन् । श्रेष्ठ भने नेपालगञ्जस्थित भेरी प्रादेशिक अस्पतालको नर्सिङ निर्देशक (एघारौँ तह) हुन् । काउन्सिलमा अझै मेट्रोनहरुका तर्फबाट हुने सदस्य पद खाली नै रहेको छ ।
