Logo
|
Friday 1st July 2022
Logo

epaper

नेपाली सेनाले दिएको रगतले बैतडीमा सुत्केरीको ज्यान बच्यो



जनस्वास्थ्य सरोकार, बैतडी । नेपाली सेनाले दिएको रगतले बैतडीमा एक सुत्केरीको ज्यान बचेको छ । शिशु जन्माउन नसकेपछि जिल्ला अस्पतालमा शल्यक्रिया गर्दा अत्यधिक रक्तस्राव भएर छट्पटाइरहेकी सुर्नया गाउँपालिका–२ लिस्किटाकी २० वर्षीया सरस्वती पाण्डेको ज्यान नेपाली सेनाको रक्तदानले बचाइएको अस्पतालका सूचना अधिकारी हरिश पन्तले जानकारी दिनुभयो ।

सदरमुकामस्थित हनुमानध्वज गुल्ममा कार्यरत सेनाका अमल्दार बालकृष्ण विष्ट र प्युठ टीकाराम विकले दिएको एकएक पिन्ट रगतले उक्त सुत्केरीको ज्यान बचाएको हो । जिल्ला अस्पतालमा सुत्केरी व्यथा लागेर दुई दिन अगाडि भर्ना हुनुभएकी सरस्वतीले शल्यक्रियाबाट शिशु जन्माएकी छन् । सरस्वतीको ‘बी पोजेटिभ’ ब्लड गु्रप रहेको र यहाँ ब्लड बैंक नहुँदा सेनाको गुल्ममा खबर गरिएको थियो ।


सूचना अधिकारी पन्त भन्नुहुन्छ ‘शल्यक्रियामार्फत शिशु जन्माउनु भएकी उहाँको शरीरमा रगतको कमी भई बेहोस भएपछि सेनालाई गुहारेका थियौैँ, सेनाले दिएको रगतबाट सुत्केरीको ज्यान जोगाउन सफल भयौं ।’

शल्यक्रियापछि बिरामीलाई डडेल्धुरा अस्पताल रिफर गरिएको र अहिले आमा र शिशुको स्वास्थ्य सुधार हुँदै गरेको अस्पतालले जनाएको छ । अस्पतालले रगत आवश्यक भएको खबर गरेकाले तत्कालै रगत दान गरिएको गुल्मपति तथा सेनानी खिलबहादुर रानाले बताउनु भयो ।

राना भन्नु हुन्छ ‘अस्पतालले रगत आवश्यक परेमा हामीलाई सधैँ खबर गर्ने गर्दछ, सेनाले दिएको रगतले धेरैको ज्यान जोगिएको छ ।’

बैतडीमा रक्तसञ्चार केन्द्र (ब्लड बैंक) नहुँदा रगतको आवश्यकता पर्दा सेना र प्रहरीकै भर पर्नुपर्ने बाध्यता रहेको छ । रासस

प्रतिक्रिया दिनुहोस्