Logo
|
Friday 27th May 2022
Logo

epaper

९३ प्रतिशत नेपालीले लगाए कोरोनाविरुद्धको खोप



जनस्वास्थ्य सरोकार, काठमाडौं । हालसम्म ९३ प्रतिशत नेपालीले कोभिड–१९ विरुद्धको खोप लगाइसकेका छन् । स्वास्थ्य तथा जनसंख्या मन्त्रालयका अनुसार १८ वर्षमाथिको कुल जनसंख्यामध्ये एक करोड ८४ लाख ९८ हजार १६० जनालाई कोभिड–१९ विरुद्धको खोपको कम्तीमा एक मात्रा दिइएको हो ।

यस्तै, पूर्ण मात्रा खोप लगाउनेको संख्या भने एक करोड ६१ लाख ८४ हजार ८५८ रहेको छ । यो कुल लक्षित जनसंख्याको ८१.२ प्रतिशत हो । साथै, १२–१७ वर्ष उमेर समूहका ३१ लाख १८ हजार ७८५ (९१ प्रतिशत) जनाले पहिलो मात्रा खोप लगाइसकेका छन् । १८ वर्षमुनि पूर्ण मात्रा खोप लगाउनेको संख्या २३ लाख ११ हजार ९९८ (६७ प्रतिशत) रहेको छ ।


मन्त्रालयका अनुसार यही चैत ४ गतेसम्ममा सबै उमेर समूहमा कुल तीन करोड ९२ लाख २३ हजार ९४१ मात्रा खोप प्रदान गरिएको छ । जसमध्ये एक करोड ८६ लाख ९५ हजार ८२६ पहिलो मात्रा, एक करोड ८६ लाख ९८ हजार ५९५ दोस्रो मात्रा र १८ लाख २९ हजार ५२० मात्रा ‘बुस्टर डोज’ प्रदान गरिएको हो ।

नेपाल सरकारले भेरोसेल, कोभिसिल्ड, अस्ट्राजेनेका, मोडर्ना, फाइजर र जोन्सन खोप प्रदान गर्दै आएको छ । केही मात्रा अनुदान सहयोग तथा अरू केही खरिद गरेर सरकारले कुल चार करोड ७८ लाख ८२ हजार ८०० मात्रा खोप प्राप्त गरेको थियो ।


नेपालमा हाल तीन हजार ९९६ सक्रिय कोरोना संक्रमित रहेका छन् । कोरोना संक्रमण सुरु भएदेखि नेपालमा गरिएका कुल परीक्षणमा ११ लाख १८ हजार १८० जनालाई कोभिड–१९ पोजिटिभ देखिएको र यसमध्ये नौ लाख ६२ हजार १७३ जनाले कोरोनालाई पराजित गरेका छन् । यस संक्रमणका कारण ११ हजार ९५० जनाको मृत्यु भएको छ ।

नेपाल सरकारले २०७८ चैतसम्ममा १८ वर्षमाथिका सबैलाई कोभिड–१९ विरुद्धको खोप लगाउने लक्ष्य लिएको छ । ‘शतप्रतिशत खोप’को लक्ष्य पूरा गर्न अब सात प्रतिशत जनसंख्यालाई मात्र खोप लगाउन बाँकी रहेको छ । १८ वर्षमुनिको उमेर समूहमा पनि पूर्ण मात्राको खोप पाउन अब नौ प्रतिशत जनसंख्या मात्र बाँकी छ । रासस

प्रतिक्रिया दिनुहोस्