कान्ति बाल अस्पतालमा उपचाररत क्यान्सर पीडित बालबालिकाका अभिभावक तथा स्याहारकर्ताहरुलाई संक्रमण सम्बन्धि सचेतना
सरसफाइ, आहार र पोषणमा विशेष ध्यान राख्न आग्रह
२०७८, ११ चैत्र शुक्रबार १९:०१ मा प्रकाशित
जनस्वास्थ्य सरोकार, काठमाडौं । कान्ति बाल अस्पतालमा उपचार गराइरहेका क्यान्सर पीडित बालबालिकाका अभिभावकहरुलाई संक्रमणसम्बन्धि अभिभावक तथा स्याहारकर्ताहरुलाई एक दिने सचेतना कार्यक्रमको आयोजना गरिएको छ । अभिभावक तथा स्याहारकर्ताहरुले अस्पतालमा उपचाररत बालबालिकाहरुलाई संक्रमणबाट जोगाउन सरसफाइ, आहार र पोषणमा विशेष ध्यान राख्न आग्रह गरियो ।
क्यान्सर पीडित बालबालिकाहरुलाई सहयोग र क्यान्सरसम्बन्धि जनचेतना अभिवृद्धिमा सक्रिय हुँदै आएको वीस नेपाल फाउन्डेसन र सामाजिक उत्तरदायित्व अन्तर्गत सनराइज बैंकको सहयोगमा सो कार्यक्रम आयोजना गरिएको हो ।
किमोथेरापी गर्दा र किमोथेरापी गरिसकेका बालबालिकाहरुको आहार, पोषण र सरसफाइमा अभिभावकहरुले विशेष ध्यान राख्न विशेषज्ञहरुले आग्रह गर्नुभएको छ ।
कार्यक्रमको टेक्निकल सत्रमा अस्पतालकी बाल क्यान्सर विशेषज्ञ डा. इच्छा ढकालले किमोथेरापी दिएका बालबालिकाहरुलाई ज्वरो, बान्ता, पखाला लाग्न सक्ने भएकाले आहार र पोषणमा ख्याल गर्नुपर्ने बताउनुभयो ।
अस्पतालकी डायटिसियन जुना ढुंगाना र नर्स पूजा ढकालले संक्रमण रोक्न हात धुने तरिका, बिरामी कुरुवाले अपनाउनुपर्ने सावधानी, क्यानुला लगाएपछि ध्यान दिनुपर्ने कुरा र व्यक्तिगत सरसफाइबारे जानकारी गराउनुभयो ।
कार्यक्रमको उद्घाटन सत्रमा बोल्दै कान्ति बाल अस्पतालका कार्यकारी निर्देशक डा. युवानिधि वसौलाले मुलुकमा बालबालिकाहरुमा हुने क्यान्सर पहिचान बृद्धि भइरहेकाले वीस नेपाल फाउन्डेसनले गरेको संक्रमण रोकथाम, आहार र पोषण एवं सरसफाइसम्बन्धि सचेतना कार्यक्रम निकै महत्वपूर्ण भएको उल्लेख गर्नुभयो ।
उहाँले यस प्रकारको कार्यक्रमलाई निरन्तरता दिन आग्रह गर्नुभयो ।
अस्पतालकी नर्सिङ प्रमुख रोशनी तुईतुईले क्यान्सर जित्न आत्मविश्वास जगाउनुपर्ने आवश्यकता औंल्याउनुभयो ।
अस्पतालका बाल क्यान्सर विशेषज्ञ डा. विष्णुरथ गिरी, डा. सनी सिपालीले उपचारलाई फलदायी बनाउन सम्भावित संक्रमण रोक्ने, खानपान र मनोवल उच्च राख्नुपर्ने उल्लेख गर्नुभयो ।
वीस नेपाल फाउन्डेसनकी अध्यक्ष केशाङ डिकी लामा र प्रबन्ध निर्देशक स्मृति पोख्रेलले यस प्रकारको कार्यक्रमहरुलाई निरन्तरता दिइरहने आश्वासन दिनुभयो ।
सनराइज बैंकका सिएआर प्रमुख सुमन थापाले आफूले सोचेभन्दा बढी उत्कृष्ठ कार्यक्रम भएको भन्दै संस्थाप्रति आभार व्यक्त गर्नुभयो । सो अवसरमा डा. सुधा बस्नेत, डा. कैलाश प्रसाद शाहले वीस नेपाल फाउन्डेसनको अभियानमा हातेमालो गर्ने इच्छा व्यक्त गर्नुभयो ।
कान्ति बाल अस्पतालमा हरेक वर्ष १ सय ७५ देखि २०० को हाराहारीमा नयाँ क्यान्सरका बालबालिकाहरु थपिने गरेका छन् ।
गत वर्ष मात्र क्यान्सर भ एर १८७ जना बालबालिका आएको अस्पतालले जनाएको छ ।
हाल अस्पतालमा नयाँ र पुराना गरी ५ सय बालबालिकाहरुले उपचार गराइरहेका छन् । त्यसमा ब्लड क्यान्सर भएका बालिकाहरुको संख्या ६० देखि ६५ प्रतिशत रहेको छ । साथै आँखाको क्यान्सर, मिर्गौला, बोन क्यान्सर, लिभरलगायतका समस्या लिएर बालबालिकाहरु क्यान्सर उपचारका लागि कान्ति बाल अस्पताल पुग्ने गरेका छन् ।
चाँडै पहिचान गरी उपचारलाई निरन्तरता दिएमा ब्लड क्यान्सर ७० देखि ७५ प्रतिशतसम्म पूर्ण रुपमा निको भएर सामान्य जीवन बिताउन सक्ने चिकित्सकहरुले बताएका छन् ।
