Logo
|
Saturday 28th May 2022
Logo

epaper

एमबीबीएस अध्ययनरत विद्यार्थी नै नक्कली परीक्षार्थी, पाँच जना पक्राउ



जनस्वास्थ्य सरोकार, काठमाडौँ । चिकित्सा शिक्षा आयोग सानोठिमीद्वारा सञ्चालित चिकित्सा शिक्षा स्नातक तहको एकीकृत प्रवेश परीक्षामा नक्कली प्रवेशपत्रसहित पाँच नक्कली परीक्षार्थी पक्राउ परेका छन् ।


यही चैत १८ गते सञ्चालन भएको मेडिकल एजुकेसन कमन इन्ट्रान्स एक्जामिनेसन २०२२ परीक्षा अनुगमनका लागि महानगरीय अपराध महाशाखाबाट खटिएको प्रहरी टोलीले विशेष सूचनाको आधारमा अपरेसन ‘इको’ सञ्चालन गरी उपत्यका स्थित सीसीआरसी कलेज, एम्बिसन कलेज, ग्रामर स्कुललगायतका परीक्षा केन्द्रबाट नक्कली परीक्षार्थी पक्राउ परेका हुन् ।

महोत्तरी जिल्ला सम्सी–४ स्थायी बसोबास भई किस्ट कलेजमा एमबीबीएसका प्रथम वर्षका विद्यार्थी २२ वर्षीय अमर पण्डितलाई पक्राउ गरिएको छ । धनुषा जनकपुर उपमहानगरपालिका–१४ बस्ने २१ वर्षीय वृकेश यादवको नाममा सीसीआरसी कलेज कुमारीपाटी ललितपुरमा परीक्षा दिइरहेको अवस्थामा उनलाई पक्राउ गरिएको महाशाखाले जनाएको छ ।

त्यस्तै धनुषा, अन्दुपट्टी गाउँपालिका–१ बस्ने २२ वर्षीय आजिवकुमार यादवको नाममा सीसीआरसी कलेज कुमारीपाटी ललितपुरमा परीक्षा दिइरहेको अवस्थामा सर्लाही चक्रघट्टा–४ का २२ वर्षीय अनिकेत चौधरी पक्राउ परेका हुन् ।

रूपन्देही ओमसतिया गाउँपालिका–३ बस्ने २० वर्षीय स्मित सिंहको नाममा ग्रामर स्कुल कोटेश्वरमा परीक्षा दिई सकेपश्चात विशेष सूचनाका आधारमा सप्तरी राजगढ–१ का राम आशिष यादवलाई नियन्त्रणमा लिइएको महाशाखाले जनाएको छ ।

त्यसैगरी महोत्तरी सम्सी गाविस–५ बस्ने २३ वर्षीय सन्नीकुमार साहको नाममा एम्बिसन कलेज मध्य बानेश्वरमा परीक्षा दिइरहेको अवस्थामा रफिगञ्ज, औरङ्गाबाद विहार, भारतका २४ वर्षीय ईस्तियाख अहमदलाई नियन्त्रणमा लिइएको छ ।

त्यस्तै रफिगञ्ज, औरङ्गाबाद विहार, भारत बस्ने २४ वर्षीय ईस्तियाख अहमदलाई आफ्नो नाममा एम्बिसन कलेज परीक्षा केन्द्रमा परीक्षा दिन लगाई आफू बाहिर बसेको अवस्थामा महोत्तरी सम्सी गाविस–५ बस्ने २३ वर्षीय सन्नीकुमार साहलाई नियन्त्रणमा लिइएको महाशाखाले जनाएको छ ।

पूर्ण छात्रवृत्तिमा एमबीबीएस पढिरहेका तर आर्थिक अवस्था कमजोर भएका जेहेन्दार विद्यार्थीहरूलाई विभिन्न आर्थिक प्रलोभन दिई फ्रि स्कलरसीप, पेइङ र जस्ट पास गर्ने वर्गीकरणका आधारमा प्रवेश परीक्षामा नाम निकालिदिए वापत रू दुई लाखदेखि १८ लाखसम्म रकम दिने प्रलोभन देखाई सहमग गराएर रू ५० हजार देखि रू दुई लाखसम्म एडभान्ससमेत दिई नक्कली प्रशिक्षार्थीको रूपमा प्रयोग गर्ने गरेको अनुसन्धानबाट खुलेको छ ।

प्रतिक्रिया दिनुहोस्