Logo
|
Tuesday 27th September 2022
Logo

epaper

साँघुरो टहराबाट सुरु भएको ५४ वर्षपछि फाप्लु अस्पतालको सुविधा सम्पन्न भवन



जनस्वास्थ्य सरोकार, सोलुखुम्बु । साना अनि साँघुरा टहराबाट ५४ वर्षदेखि स्वास्थ्य सेवा प्रदान गर्दै आएको सोलुुखम्बुको जिल्ला अस्पतालको सुविधा सम्पन्न भवन तयार भएको छ ।

जिल्ला समन्वय समितिका प्रमुख तथा अस्पताल व्यवस्थापन समितिका अध्यक्ष कृष्णप्रसाद निरौला र सोलुदूधकुण्ड नगरपालिकाका नगरप्रमुख नाम्गेलजाङबु शेर्पाले बुधबार संयुक्त रूपमा उद्घाटन गरेपछि लिफ्ट सहितको अपाङ्गमैत्री नयाँ भवनबाट एकीकृत स्वास्थ्य सेवा शुरु हुने भएको छ ।

अस्पताल व्यवस्थापन समितिका अध्यक्ष समेत रहनुभएका जिल्ला समन्वय समिति सोलुखुम्बुका प्रमुख निरौलाले अस्पतालको दरबन्दीअनुसारको जनशक्ति र उपकरण व्यवस्थापनमा स्थानीय तह, प्रदेश र संघीय सरकारसँग समन्वय गर्ने बताउनुभयो ।

सोलुदूधकुण्ड नगरपालिकाका प्रमुख शेर्पाले जिल्ला अस्पताल भौतिक पुर्वाधारमा अब्बल बनेकाले अब सेवा प्रवाहमा चुस्त र स्तरीय बनाउन लाग्नुपर्ने बताउनुभयो । जनशक्ति र आवश्यक उपकरण व्यवस्थापनमा नगरपालिकाले सहजीकरणमा सक्दो सहयोग गर्ने प्रतिबद्धता उहाँको छ ।

यसअघि अपर्याप्त संरचनाबाट अधिकतम् सेवा दिँदै आएकोमा भौतिक पुर्वाधार पर्याप्त र सबल बनेकोमा खुसी व्यक्त गर्दै अस्पतालका निमित्त कार्यालय प्रमुख सानी शेर्पाले आवश्यक जनशक्ति र उपकरण व्यवस्थापन हुनसके जिल्ला अस्पतालको सेवा प्रवाहमा उल्लेख्य सुधार ल्याउन सकिने बताउनुभयो ।

सहरी विकास मन्त्रालयको करिब २१ करोड २१ लाख रुपैयाँको लागतमा निर्माण भएको ३० शय्याको अस्पताल भवन २०७६ पुस २७ गतेबाट निर्माण सुरु भएर असार २५ गते निर्माण कम्पनीले हस्तान्तरण गरेको थियो ।

विश्वको सर्वोच्च शिखर सगरमाथामा पहिलो पाइला टेक्ने सर एडमन्ड हिल्लारीले ५४ वर्षअघि स्थापना गर्नुभएको फाप्लु अस्पताल करिब ६४ रोपनी क्षेत्रफलमा फैलिएको छ । हालै नवनिर्मित भवन सात रोपनी क्षेत्रफलमा बनेको अस्पताल प्रशासनले जनाएको छ ।

अस्पतालको आफ्नै सुविधा सम्पन्न भवन नहुँदा लामो समयदेखि पुरानो भवनबाट सेवा प्रवाह हुँदै आएको थियो । सरकारले कर्मचारीको दरबन्दी घटाउँदा सेवा प्रवाहमा चुनौतीको सामना गर्नुपरेको अस्पताल व्यवस्थापन समितिले जनाएको छ ।

प्रतिक्रिया दिनुहोस्