सञ्चो अस्पतालका चिकित्सक कुट्ने दुइजनाविरुद्ध किटानी जाहेरी
२०८०, २९ भाद्र शुक्रबार ११:३३ मा प्रकाशित
जनस्वास्थ्य सरोकार, मकवानपुर । हेटौंडाको सञ्चो अस्पतालका चिकित्सकलाई कुट्ने दुइजनाविरुद्ध जिल्ला प्रहरी कार्यालय मकवानपुरमा किटानी जाहेरी परेको छ ।
नेपाल चिकित्सक संघका केन्द्रीय अध्यक्ष अनुपविक्रम कार्कीले शुक्रबार जिल्ला प्रहरी कार्यालयमा किटानी जाहेरी दिनुभएको हो ।
गत साउन २५ गते उपचारका लागि सञ्चो अस्पताल आएका ४१ वर्षीय राजेश प्रधानको मृत्युको विषयलाई लिएर अस्पतालमा कार्यरत डा. विकास थापा र डा. प्रशान्त विडारीमाथि कुटपिट भएको थियो ।
चिकित्सक कुटपिट घटनामा संलग्न मृतककै परिवारका सदस्य अनुप प्रधान र रोहित प्रधानविरुद्ध किटानी जाहेरी दर्ता भएको जिल्ला प्रहरी कार्यालयका प्रवक्ता समेत रहनुभएकी डीएसपी लक्ष्मी भण्डारीले जानकारी दिनुभयो ।
संघका अध्यक्ष कार्कीले कुटपिटमा संलग्न सबैमाथि कारबाहीको माग गर्दै सीसीटीभीमा देखिएका सबैलाई पक्राउ गर्न माग समेत गर्नुभएको छ ।
