आईपीओ जारी गर्दै स्टार अस्पताल
२०८०, ५ आश्विन शुक्रबार १०:४७ मा प्रकाशित
जनस्वास्थ्य सरोकार, ललितपुर। सानेपास्थित स्टार हस्पिटल लिमिटेडले साधारण सेयर (आईपीओ) जारी गर्ने भएको छ । आईपीओ निष्काशनको प्रक्रिया अघि बढाउनका लागि बिक्री प्रबन्धकमा मुक्तिनाथ क्यापिटललाई नियुक्त गरेको हो ।
आश्विन ४ गते आयोजित एक कार्यक्रममा स्टार हस्पिटलका तर्फबाट कार्यकारी अध्यक्ष किशोर कुमार महर्जन र मुक्तिनाथ क्यापिटलका तर्फबाट प्रमुख कार्यकारी अधिकृत कविन्द्र ध्वज जोशीले सम्झौतापत्रमा हस्ताक्षर गर्नुभएको छ ।
स्टार हस्पिटल लिमिटेडले रु ४० करोड सेयर पूँजी बराबरको रु १०० अँकित दरको ४० लाख कित्ता शेयर सर्वसाधारणहरुलाई बिक्री गर्न लागेको हो ।
यस थप पूँजी लगानीबाट अस्पतालले आधुनिक उपकरणहरु सहित नयाँ उपचार सेवाका विधाहरु जस्तै क्यान्सर सेवा, आइभिएफ सेवा र नेपालका विभिन्न स्थानहरुमा उपचार सेवा विस्तार गर्ने योजना रहेको बताइएको छ।
करिब ६९ करोड चुक्ता पूँजी भएको यस हस्पिटल संग २५ प्रतिशत अग्राधिकार सेयर सहित रु ८५ करोड चुक्ता पूँजी रहेको अवस्थामा यो निष्कासन संगै केही संस्थागत लगानीकर्ताहरु, बीमा कम्पनीहरु, प्राइभेट इक्विटी कम्पनीहरु तथा नीजि संस्थागत लगानीकर्ताहरु समेतको गरी चुक्ता पूँजी रु २ अर्ब भन्दा माथि हुने जानकारी गराईएको छ ।
