क्यान्सर रोगबाट पीडित पूर्वमन्त्री खेमराज भट्टको निधन
२०८०, ५ आश्विन शुक्रबार ११:५० मा प्रकाशित
जनस्वास्थ्य सरोकार, काठमाडौँ । पूर्वमन्त्री खेमराज भट्ट ‘मायालु’को ७६ वर्षको उमेरमा ‘क्यान्सर’ रोगबाट गए राति निधन भएको छ। उहाँको उपचारका क्रममा वीर अस्पतालमा निधन भएको भाइ छविलाल भट्टले जानकारी दिनुभयो ।
गणतन्त्रवादी नेताका रूपमा परिचित नेता मायालुले २०५६ सालमा बर्दिया क्षेत्र नं ३ बाट नेपाली कांग्रेसको तर्फबाट प्रतिनिधिसभा सदस्य निर्वाचित हुनुभएको थियो ।
२०५८ सालमा गठित शेरबहादुर देउवा नेतृत्वको सरकारमा उहाँ सामान्य प्रशासनमन्त्री हुनुभएको थियो ।
विसं २००४ मा डडेल्धुराको डुङ्गरी भन्ने ठाउँमा जन्मिनुभएका उहाँले नेपाल विद्यार्थी संघबाट राजनीतिक यात्रा सुरु गर्नुभएको थियो । पछि उहाँ रामराजाप्रसाद सिंहसँगै रहेर नेपालमा गणतन्त्र स्थापना गर्नका लागि आन्दोलन होमिनुभएको थियो ।
विसं २०४२ को बम काण्डपछि तत्कालीन सरकारले उहाँको सम्पति सर्वश्वहरण गरेपछि १२ वर्ष भारतमा निर्वासित जीवन बिताउनुभएको थियो । उहाँका दुई छोरा छन्। श्रीमतीको यसअघि नै मिर्गौला रोगका कारणबाट निधन भइसकेका थियो। उहाँको आजै पशुपति आर्यघाट अन्त्येष्टि गरिने छ। रासस
