Logo
|
Tuesday 25th June 2024
Logo

epaper

पाठेघरको मुखको क्यान्सरः दश हजार किशोरीलाई ‘एचपीभी’ खोप, दुई मात्राले ९५ प्रतिशत सुरक्षा

दोस्रो मात्राको खोप आगामी माघमा हुने



जनस्वास्थ्य सरोकार, काठमाडौँ । पाठेघरको मुखको क्यान्सरविरुद्धको ‘एचपीभी’ खोप दश हजार किशोरीले लगाएका छन् ।

स्वास्थ्य सेवा विभागअन्तर्गतको परिवार कल्याण महाशाखाको बाल स्वास्थ्य तथा खोप शाखाका प्रमुख डा. अभियान गौतमका अनुसार ९ हजार ९ सय ९९ जना किशोरीले एचपीभी खोप लगाएका छन् । उहाँले लक्ष्यअनुसार नै किशोरीहरुले एचपीभी खोप लगाएको बताउनुभयो ।

स्वास्थ्य तथा जनसङ्ख्या मन्त्रालयले गएको भदौ २७ गतेदेखि खोप अभियान सञ्चालन गरेको थियो ।

सरकारले भदौ २७ गतेदेखि मधेस प्रदेशको वीरगञ्जमा रहेको नारायणी अस्पताल, बाग्मती प्रदेशको परोपकार प्रसूति तथा स्त्री रोग अस्पताल, गण्डकी प्रदेशको गण्डकी स्वास्थ्य विज्ञान प्रतिष्ठान, लुम्बिनी प्रदेशको भेरी अस्पताल बाँके, कर्णाली प्रदेशको प्रादेशिक अस्पताल र सुदूरपश्चिम प्रदेशको डडेलधुरा अस्पतालमा खोप अभियान सञ्चालन गरेको थियो ।

अभियान अन्तर्गत १४ वर्ष उमेर पूरा भइ १५ वर्ष नकटेका किशोरीलाई पाठेघरको मुखमा हुने क्यान्सरबाट बचाउनका लागि एचपीभी खोप लगाइएको हो । खोपको दोस्रो मात्रा आउँदो माघमा सञ्चालन गरिने डा. गौतमले जानकारी दिनुभयो ।

नेपाल सरकारले चीन सरकारसँग महिलाको पाठेघरको मुखमा हुने क्यान्सरविरुद्धको २० हजार डोज खोप खरिद गरेको थियो । यो खोप दुई मात्रा लगाएपछि पाठेघरको मुखमा हुने क्यान्सरको सङ्क्रमण ९५ प्रतिशत सुरक्षा प्रदान गर्ने दाबी गरिएको छ ।

प्रतिक्रिया दिनुहोस्