स्वास्थ्य क्षेत्रमा देखापरेका चुनौतिहरुतर्फ सचेत रहन प्रधानमन्त्री प्रचण्डको जोड
मुलुकलाई मेडिकल शिक्षाको हबका रूपमा विकास गर्न सरकारले आवश्यक तयारी गरिरहेको जानकारी
२०८१, १२ बैशाख बुधबार १०:३३ मा प्रकाशित
नेपाल हेल्थ न्युज, काठमाडौँ । प्रधानमन्त्री पुष्पकमल दाहाल ‘प्रचण्ड’ले स्वास्थ्य क्षेत्रमा देखापर्ने समस्या समाधान गर्न विशेष ध्यान पुर्याउनुपर्ने बताउनुभएको छ । पाटन स्वास्थ्य विज्ञान प्रतिष्ठानको प्रथम दिक्षान्त समारोहलाई सम्वोधन गर्दै प्रधानमन्त्री प्रचण्डले सो कुरा बताउनुभएको हो ।
स्वास्थ्य क्षेत्रमा देखापरेका चुनौतिहरुतर्फ सचेत रहनसमेत प्रधानमन्त्रीले जोड दिनुभयो । उहाँले अस्पतालको सेवालाई गुणस्तर र प्रभावकारी बनाउन जोड दिइने उल्लेख गर्दै भन्नुभयो-ग्रामीण क्षेत्रमा स्तरीय स्वास्थ्योपचारका लागि दक्ष तथा सामाजिक उत्तरदायित्वको भावनाबाट प्रेरित चिकित्सक उत्पादन गर्नुपर्छ ।
सरकारले सार्वजनिक अस्पतालहरूको क्षमता विकासलाई उच्च प्राथमिकतामा राखेको छ । प्रधानमन्त्री प्रचण्डले भन्नुभयो स्वास्थ्य सेवामा सबैको पहुँच पुग्नुपर्छ । त्यसैले सामाजिक, सांस्कृतिक, वातावरणीय कारकतत्त्व पहिचान सहितको विशिष्टिकृत स्वास्थ्य सेवा उपलब्ध गराउन प्रतिष्ठानले अझै पहलकदमी लिनुपर्छ ।
प्रधानमन्त्री प्रचण्डले देशभित्रका सबै चिकित्सा तथा स्वास्थ्य विज्ञान प्रतिष्ठानको व्यवस्थापन, सञ्चालन र नियमनका लागि चिकित्सा शिक्षा र स्वास्थ्य सेवामा रहेको दोहोरोपन हटाउन र एकीकृत स्वास्थ्य विज्ञान प्रतिष्ठान निर्माण गर्न आवश्यक भएको उल्लेख गर्नुभयो ।
उहाँले सामुदायिक एवं सहकारी अस्पतालहरूको क्षमता विकासमा ध्यान दिुपर्छ भन्दै मुलुकलाई मेडिकल शिक्षाको हबका रूपमा विकास गर्न सरकारले आवश्यक तयारी गरिरहेको जानकारी गराउनुभयो ।
