मुलुकमा कोरोना संक्रमितको संख्या एक सय नाघ्यो
२०७७, २६ बैशाख शुक्रबार ०८:०९ मा प्रकाशित
नेपालमा कोरोनाभाइरस सङ्क्रमण पुष्टि भएका व्यक्तिको सङ्ख्या १०० नाघेको छ।
बिहीवार साँझ स्वास्थ्य तथा जनसङ्ख्या मन्त्रालयले थप दुई जनामा कोभिड-१९ पुष्टि भएको जनाएपछि सङ्क्रमितको कुल सङ्ख्या १०१ पुगेको छ।
मन्त्रालयका अनुसार कपिलवस्तुमा १६ र २२ वर्षका दुई पुरुषमा कोरोनाभाइरस देखिएको हो । अहिले देशभरि १७,००० जनाभन्दा बढी मानिस क्वारन्टीनमा छन् भने सम्भावित सङ्क्रमितसहित १३३ जनालाई चिकित्सकीय निगरानीमा अलग्गै राखिएको छ।
अहिलेसम्म देशका सातमध्ये छवटा प्रदेशमा कोभिड-१९ भएका व्यक्ति फेला परेका छन् । सरकारले अहिलेसम्म २२ जना निको भएर अस्पतालबाट बिदा भएको बताएको छ। तर निको भएर घर फर्किएकामध्ये काठमाण्डूका एक जना र पर्साका दुई जनालाई पुनः परीक्षणको क्रममा कोरोनाभाइरस देखिएपछि अस्पताल भर्ना गरिएको छ।
बीबीसी नेपाली सेवाका अनुसार, अतिप्रभावित देखिएका प्रदेश नं १ को उदयपुर, प्रदेश नं २ को पर्सा र प्रदेश नं ५ को बाँकेमा थप परीक्षण गरिने सरकारले जनाएको छ । स्वास्थ्य मन्त्रालयका प्रवक्ता डा. विकास देवकोटाका अनुसार नेपाली सेनाको सहयोगमा उदयपुरमा कम्तीमा ५००, वीरगन्जमा कम्तीमा १,००० र नेपालगन्जमा कम्तीमा १,००० मानिसबाट परीक्षणका लागि नमुना सङ्कलन गरिनेछ।
