चितवन मेडिकल कलेजमा उपचाररत दुई कोरोना संक्रमित वृद्धको मृत्यु
२०७७, १४ कार्तिक शुक्रबार १४:२९ मा प्रकाशित
जनस्वास्थ्य सरोकार, काठमाडौँ । चितवन मेडिकल कलेजमा उपचाररत कोरोना सङ्क्रमणबाट दुई वृद्धको मृत्यु भएको छ । मृत्यु हुनेमा एक चितवनका र अर्का रुपन्देहीको अस्पतालका प्रेस संयोजक डा किशोर अधिकारीले जानकारी दिनुभयो ।
उहाँका अनुसार रत्ननगर नगरपालिका–९ का ८८ वर्षीय कोरोना सङ्क्रमित वृद्ध रहेका छन् । उच्च रक्तचाप र मधुमेहको समस्या भएका उनी अस्पतालमा कात्तिक ११ गते भर्ना भएका थिए । उनको स्वाब परीक्षण गर्दा १२ गते कोरोना पुष्टि भएको थियो ।
त्यस्तै अस्पतालको कोभिड सघन उपचार कक्षमा उपचारको क्रममा आज बिहान ६ः५४मा उनको मृत्यु भएको प्रेस संयोजक डा. अधिकारीले जानकारी दिनुभयो ।
यस्तै अर्का रुपन्देही जिल्ला बुटवल उपमहानगरपालिका–८ का ८४ वर्षीय वृद्धको कोरोना सङ्क्रमणबाट मृत्यु भएको छ । अस्पतालका अनुसार उनी कात्तिक ३ गते कोरोना पुष्टि भएर ११ गते अस्पताल भर्ना भएका थिए । ज्वरो, उच्च रक्तचाप र श्वासप्रश्वासको समस्या भएका उनको बिहीबार राति ११ः४७ बजे मृत्यु भएको डा अधिकारीले बताउनुभयो । उनको स्वास्थ्यमा जटिल समस्या भएपछि कोभिड सघन उपचार कक्षमा राखेर उपचार हुँदै आएको थियो ।
