अन्तत कक्षा १२ को परीक्षा सुरु, विद्यार्थीहरुले पहिलोपटक मास्क र फेस सिल्ड लगाएर परीक्षा दिए
२०७७, ९ मंसिर मंगलवार १०:५३ मा प्रकाशित
जनस्वास्थ्य सरोकार, काठमाडौँ । झण्डै ८ महिना लामो अन्योलता र अनिश्चिततापछि अन्तत कक्षा १२ को परीक्षा सुरु भएको छ । पहिलोपटक विद्यार्थीहरु मास्क र फेस सिल्ड लगाएर परीक्षामा सामेल भएका छन् ।
कोरोना त्रासकै बीच लामो प्रतीक्षापछि विद्यार्थीहरु परीक्षामा सहभागी हुन पाएका छन् । यस पटकको परीक्षा विगतका वर्षहरुको तुलना धेरै किसिमले फरक छ ।
फेस सिल्ड र मास्क लगाएर परीक्षामा बस्नु पर्दा केही असहज भए पनि शैक्षिक सत्र खेर नजाने भएकोमा विद्यार्थीहरुले खुसी व्यक्त गरेका छन् ।
परीक्षामा सहभागी हुने विद्यार्थीको अनिवार्य रुपमा ज्वरो मापन गर्नुपर्न, मास्कको अनिवार्य रुपमा प्रयोग गर्नुपर्ने र कक्षा कोठामा कम्तीमा २ मिटरको दूरी कायम गर्नुपर्ने राष्ट्रिय परीक्षा बोर्डले निर्देशन दिएको छ ।
तोकिएको स्वास्थ्य मापदण्डको पालना गर्दै ठीक समयमा परीक्षा शुरु गरिएको विजय मेमोरियल माविका प्रधानाध्यपक तथा केन्द्राध्यक्ष डिल्लीप्रसाद शर्मा ढकालले जानकारी दिनुभयो ।
कोरोना भाइरसको महामारीको त्रासले सरकारले गत वर्षको चैतमा लकडाउन शुरु गरेसँगै वैशाखमा हुनुपर्ने कक्षा १२ को परीक्षा रोकिएको थियो ।
एक सय पूर्णाङ्कको परीक्षा दिने विद्यार्थीहरुले यस पटक ४० पूर्णाङ्कको परीक्षा दिनेछन् । बाँकी रहेको ६० पूर्णाङ्कको भने आन्तरिक मूल्याङ्कन गरिनेछ ।
