नेपालमा थप २,४३३ जनामा कोरोना संक्रमण, १९२९ निको, २६ जनाको मृत्यु
२०७८, १० भाद्र बिहीबार १७:२१ मा प्रकाशित
जनस्वास्थ्य सरोकार, काठमाडौँ । नेपालमा थप २,४३३ जनामा कोरोना भाइरस संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार ९,७०२ पीसीआर परीक्षणमा २,०५२ जना र ४,६७२ एन्टिजेन परीक्षणमा ३८१ जना गरी २४३३ जनामा संक्रमण पुष्टि भएको हो । यो सँगै नेपालमा कोरोना संक्रमितको कुल संख्या ७ लाख ५४ हजार ९१५ पुगेको छ ।
पछिल्लो २४ घण्टामा १९२९ जना संक्रमणमुक्त भएका छन् । हालसम्म ७ लाख ५ हजार ८९३ जना संक्रमणमुक्त भएका छन् । त्यस्तै संक्रमणका कारण २६ जनाको मृत्यु भएको छ । अहिलेसम्म कोरोनाबाट ज्यान गुमाउनेको संख्या १० हजार ६३८ पुगेको छ ।
हाल देशभर सक्रिय संक्रमितको संख्या ३८ हजार ३८४ जना रहेका छन् । जसमध्ये ३५ हजार ३५४ जना होम आइसोलेसनमा रहेका छन् भने ३ हजार ३० जना संस्थागत आइसोलेसनमा रहेका छन् । कोरोनाका बिरामीमध्ये ६२० जना आईसीयू र १६५ जना भेन्टिलेटरमा उपचाररत् छन् ।
