Logo
|
Monday 20th September 2021
E-paper Magazine

५० लाख बढी खर्च हुँदा पनि किन निशाको स्वास्थ्यमा सुधार आउन सकेन ?



जनस्वास्थ्य सरोकार, काठमाडौँ । नर्भिक अस्पतालले उद्धार गरेको झण्डै तीन महिना बित्न लाग्दा पनि मोडल तथा कलाकार निशा घिमिरेको स्वास्थ्य अवस्थामा अपेक्षित सुधार आउन सकेको छैन ।

निशालाई अझै पनि अक्सिजनकै सपोर्टमा सिसीयूमा राखेर उपचार गरिरहेको अस्पतालले जनाएको छ । शरीरमा केही मासु लागे पनि घाउहरु भने लामो समयसम्म निको हुन नसकेको उपचारमा संलग्न चिकित्सकको भनाइ छ ।

गत जेठ २७ गते नर्भिक अस्पतालका प्रबन्ध संचालक मेघा चौधरी र केही समाजसेवीहरु मिलेर निशाको उद्धार गरिएको थियो । हालसम्म उपचारमा लागेको सम्पूर्ण खर्च प्रबन्ध संचालक चौधरी र अस्पतालले बेहोर्दै आएको छ। अस्पतालका अनुसार हालसम्म निशाको उपचारमा ५० लाख रुपैयाँभन्दा बढी खर्च भइसकेको छ ।

अस्पतालका प्रमुख कार्यकारी अधिकृत अजयकुमार मिश्रले नेपालमा उपलब्ध सबैखालका प्रविधि, सीप तथा विधिको प्रयोग गर्दापनि निशाको स्वास्थ्य अवस्थामा खासै सुधार आउन नसकेको बताउनुभयो ।

डा. पंकज जलान नेतृत्वको टिमले घिमिरेको उपचार गरिरहनुभएको छ । नर्भिकले सकेसम्म सबै विकल्पमा गएर निशाको उपचार गरिरहेको डा. जलानले बताउनुभयो ।

उहाँका अनुसार दुर्घटनाका कारण घिमिरेको ब्रेन इञ्जुरी भएको र त्यसको अवस्था निकै जटिल रहेकोले पूर्ण रुपमा नर्मल हुने संभावना देखिन्न । दुर्घटनापछि घिमिरेको ब्रेनमा निकै ड्यामेज भएको र लामो समय उपचारविहीन अवस्थामा राखिएकोले समेत अहिले सबै कोशिशका बाबजुद घिमिरेको अवस्थामा अपेक्षित सुधार हुन नसकेको उहाँको भनाई छ ।

अस्पतालले निशाको उपचारका क्रममा अरु कोही व्यक्ति वा संस्थाबाट कुनै पनि सहयोग नलिएको र लिन आवश्यक समेत नरहेको प्रष्ट पारेको छ ।

प्रतिक्रिया दिनुहोस्