भारतमा घट्दै कोरोना संक्रमण
२०७८, १० माघ सोमबार १०:५० मा प्रकाशित
जनस्वास्थ्य सरोकार, नयाँ दिल्ली । भारतमा लगातार तीन दिनयता नयाँ कोरोना संक्रमितको संख्यामा कमी आएको देखिन्छ । पछिल्लो २४ घण्टामा भारतमा ३ लाख ६ हजार ६४ जनामा कोरोना भाइरस संक्रमण पुष्टि भएको छ ।
बितेको शनिबार ३ लाख ३३ हजार ५३३ जनामा र शुक्रबार ३ लाख ३७ हजार जनामा कोभिड–१९ पुष्टि भएको थियो । शनिवारको तुलनामा आइतबार २७ हजार ४६९ अंकले संक्रमितको संख्यामा कमी आएको छ ।
भारतीय स्वास्थ्य मन्त्रालयकाअनुसार यस अवधिमा २ लाख ४३ हजार जना कोभिड–१९ संक्रमणमुक्त भएका छन् भने यस अवधिमा ४३९ जनाको निधन भएको छ । हाल देशभर सक्रिय संक्रमितको संख्या २२ लाख ४३ हजार जना रहेको छ ।
हालसम्म भारतमा ३ करोड ९५ लाख ४२ हजार ४३५ जनामा कोरोना भाइरुस संक्रमण पुष्टि भएको छ । कुल संक्रमितमध्ये ३ करोड ६७ लाख ९३ हजार ८७ जना कोभिड–१९ संक्रमणमुक्त भएका छन् । कोरोना महामारीको चपेटामा परेर यहाँ हालसम्म ४ लाख ८९ हजार ८४४ जनाको निधन भएको छ ।