असुरक्षित यौन सम्बन्धमा बसेकाहरूमा देखिने लक्षण
२०८०, २२ असार शुक्रबार १३:१४ मा प्रकाशित
मेरो एक हप्ता अघि असुरक्षित शारीरिक सम्बन्ध भएको थियो । कुनै यौन रोग लाग्यो कि भनेर म चिन्तित छु । यौन रोग लागेको कसरी थाहा पाउने ? जोगिन के गर्ने होला ? कति समयमा यौन रोगको लक्षण देखिन्छ ?
-आर
असुरक्षित शारीरिक सम्बन्ध भएको पहिलो ३—४ दिनदेखि २ वर्षसम्म यौन रोगसम्बन्धि लक्षण देखिनसक्छ । करिब ९० प्रतिशत यौन रोगको लक्षण पहिलो एक महिनामा देखिन्छ । यसमध्ये ५० प्रतिशत यौन रोग पहिलो १० दिनमा देखिन्छ । प्राय: हुने यौन रोगहरू जस्तैः योनी वा लिङ्गमा एकदमै दुख्ने घाउ (स्यांक्रोइड) को लक्षण तीनदेखि ४ दिनमा देखिनसक्छ ।
पानीका फोकाहरू आउने, पोल्ने, दुख्ने (हर्पिस) समस्याको लक्षण पहिलो ७ देखि १४ दिनमा आउँछ । कमन गोनोरिया यौन रोगमा सेतो वा पहेँलो गन्हाउने पिपजस्तो पदार्थ योनी वा लिङ्गबाट आउँछ । यस्तो प्रकारको यौन रोगको लक्षण पहिलो ३ देखि ७ दिनमा देखिनसक्छ । मुख्य यौन रोगहरू यीनै हुन् ।
१० दिन पछाडि आउने यौन रोगहरूमा सिफिलिस (भिरिङ्गी) लगायत रहेको छ । यसमा लिङ्ग वा योनीमा नदुख्ने घाउ आउँछ । यो करिब २० देखि ९० दिनसम्म आउनसक्छ । सामान्यतया पहिलो ४ हप्तामा भिरिङ्गीको घाउ आउँछ । यसैगरी टोनोभानोसिस यौन रोगमा छुँदा रगत आउने खालको लिङ्ग वा योनीमा घाउहरू आउँछन् ।
यस्तो घाउ ४ देखि ट हप्तामा आउँछ । त्यसपछि मुसाजस्ता दानाहरु योनाङ्गमा आउँछ । यस्ता प्रकारका दानाहरू करिब ३ महिनामा देखिनसक्छ । त्यसैले पहिलो तीन महिनामा लक्षण नदेखिएमा तपाईंलाई करिब ९९ प्रतिशत यौन रोग लाग्ने संभावना हुँदैन । यसरी यौन रोगसम्बन्धि आफूलाई कुनै जिज्ञासा लागेमा नजिकैको छाला तथा यौन रोग विशेषज्ञसँग परामर्श लिनुहोला । आफूखुशी उपचार गर्ने प्रयास नगर्नुहोला ।
