चिकित्सकलाई स्वास्थ्यमन्त्री बस्नेतको आग्रह : आन्दोलन स्थगित गरी काममा फर्कनू
२०८०, १२ आश्विन शुक्रबार १७:४१ मा प्रकाशित
जनस्वास्थ्य सरोकार, काठमाडौँ । स्वास्थ्य तथा जनसंख्यामन्त्री मोहनबहादुर बस्नेतले चिकित्सकहरुलाई आन्दोलन फिर्ता लिन आग्रह गर्नुभएको छ ।
शिक्षा, स्वास्थ्य तथा सूचना प्रविधि समितिको आजको बैठकमा मन्त्री बस्नेतले चिकित्सकलाई आन्दोलन स्थगित गरी काममा फर्कन अनुरोध गर्नुभएको हो ।
उहाँले भन्नुभयो–‘स्वास्थ्यकर्मी कुटपिटको घटनामा संलग्न भनिएको व्यक्तिलाई पक्राउ गरेको र प्रहरीलाई समेत निलम्बन र विभागीय कारबाही गरिसकेकाले आन्दोलनरत चिकित्सकहरूलाई काममा फर्कन अनुरोध गर्दछु ।’
प्रतिनिधिसभाको शिक्षा, स्वास्थ्य तथा सूचना प्रविधि समितिको बैठकमा सहभागी चिकित्सकहरूले दोषीलाई कारबाही नभएको र अस्पतालमा सुरक्षा नभएकाले काममा फर्कन नसक्ने बताएपछि मन्त्री बस्नेतले तत्काल हतियारसहित सुरक्षाकर्मी अस्पताल पठाएर डाक्टरहरूलाई सुरक्षित रुपमा काम गर्ने वातावरण बनाउन सरकार तयार रहेको प्रतिबद्धता समेत जनाउनुभयो ।
त्यस्तै बैठकमा गृह मन्त्रालयका सचिव दिनेश भट्टले पनि आन्दोलनरत आवासीय चिकित्सकलाई आन्दोलनको कार्यक्रम फिर्ता लिएर काममा फर्कन आग्रह गर्नुभयो ।
उहाँले भन्नुभयो–, “घटनामा संलग्नलाई कारबाही गर्न मन्त्रालय सुरक्षा प्रशासन प्रयत्नशील छ । आन्दोलनले आमनागरिकमा पर्न गएको समस्याप्रति संवेदनशील बन्न आग्रह गर्दछु ।”
आन्दोलनरत आवासीय चिकित्सकहरुले आफ्नो सुरक्षाका लागि सडकमा उत्रन बाध्य भएको बताए । उनीहरुले मणिपाल शिक्षण अस्पतालमा भएको घटनामा संलग्नलाई तत्काल काबाहीको माग राखे।
