उपचाररत पाइलट शाक्यको स्वास्थ्य सुधारोन्मुख, आइसियुबाट निकालियो
![](https://i0.wp.com/nepalhealthnews.com/wp-content/uploads/2024/07/Shakya.jpg?resize=720%2C382&ssl=1)
नेपाल हेल्थ न्युज, काठमाडौँ । दुर्घटनामा घाइते भएका सौर्य एयरलाइन्सका क्याप्टेन मनिषरत्न शाक्यको स्वास्थ्य अवस्था सुधारोन्मुख रहेको काठमाडौँ मेडिकल कलेज केएमसीले जनाएको छ ।
अस्पतालकी निर्देशक प्रा.डा. मीना थापाले शुक्रबार दिउँसो विज्ञप्ति जारी गर्दै उपचाररत शाक्यको स्वास्थ्य सुधारोन्मुख रहेको जानकारी दिनुभयो ।
क्याप्टेन शाक्यलाई बिहीबार साँझ आइसीयूबाट बाहिर निकालिएको अस्पतालकी निर्देशक प्रा.डा. थापाले जानकारी दिनुभयो ।
‘‘उहाँको अनुहार, आँखा, नाक तथा टाउकोमा चोट लागेको छ, ढाडको एउटा हड्डी साथै देव्रेपट्टीका तीन वटा करङ्ग भाँच्चिएका छन् । स्वास्थ्य सुधारोन्मुख छ ” विज्ञप्तिमा भनिएको छ ।
बुधबार बिहान सौर्य एयरलाइन्सको विमान त्रिभुवन अन्तर्राष्ट्रिय विमानस्थल परिसरमा दुर्घटनाग्रस्त हुँदा सोही विमानका चालक शाक्यलाई घाइते अवस्थामा उद्धार गरिएको थियो ।
विमानमा सवार १८ जनाको मृत्यु भएको छ । शाक्यलाई उद्धार गरी केएमसीको सघन उपचार कक्षमा उपचार थालिएको थियो ।