स्वास्थ्यमन्त्री पौडेलको सम्बद्ध निकायलाई निर्देशनः ‘आयुर्वेद उपचार प्रभावकारी बनाउन एक साताभित्र प्रष्ट योजना पेश गर्नुस्’
२०८१, २१ भाद्र शुक्रबार १७:५७ मा प्रकाशित
नेपाल हेल्थ न्युज, काठमाडौँ । स्वास्थ्य तथा जनसंख्यामन्त्री प्रदीप पौडेलले आयुर्वेद उपचारमा आकर्षण घटिरहेको भन्दै सेवा प्रभावकारी बनाउन १ हप्ताभित्र प्रष्ट योजनाका साथ उपस्थित हुन सम्बद्ध अधिकारीहरुलाई आग्रह गर्नुभएको छ ।
मन्त्रालयमा आयोजित आयुर्वेद सम्बद्ध अधिकारीहरुसँगको बैठकमा बोल्दै मन्त्री पौडेलले तत्काल स्रोत थप्न सकिने अवस्था नरहेको भन्दै मौजुदा अवस्थामै सुधार गर्न सकिने योजनासाथ आउन आग्रह गर्नुभयो ।
‘सेवा सुधारका लागि आवश्यक नीतिगत व्यवस्था गर्न हामी तयार छौं,’ उहाँले भन्नुभयो– ‘१ हप्ताभित्र प्रष्ट योजना लिएर आउनुहोला । द्रुत गतिमा सुधार ल्याउने गरी काम गरौं । म साथ दिन तयार छु ।’
उहाँले स्रोतको मितव्ययी सदुपयोग गर्नका लागि समेत आग्रह गर्नुभयो । मन्त्री पौडेलले आयुर्वेद उपचारले सान्दर्भिकता गुमाएको जस्तो देखिने भन्दै सुधार गर्न नसकिए पद ओगटेर बस्न नहुने बताउनुभयो । ‘सकेसम्म सुधार गरौं,’ उहाँले भन्नुभयो ‘तर डुबाउने गरी (पदमा) नबसौं ।’
देशमा आयुर्वेदबारे पर्याप्त अध्ययन अनुसन्धान समेत नभएको रिसर्च सेन्टर छैन आयुर्वेद क्षेत्रमा भारतले गरेको प्रगतिबाट समेत सिकेर सुधार गर्नुपर्ने बताउनुभयो ।
