विश्व इन्डोयुरोलोजी सम्मेलनमा डा. संजय खड्कीको कार्यपत्र प्रस्तुत
२०७६, १९ कार्तिक मंगलवार १२:१६ मा प्रकाशित
जनस्वास्थ्य सरोकार, काठमाडौँ । इण्डोयुरोलोजी सम्बन्धी ३७ औं विश्व सम्मेलनमा एक नेपाली चिकित्सकले आफ्नो कार्यपत्र प्रस्तुत गरेका छन् । इमिरेट्स युरोलोजिकल सोसाइटीले युनाइटेड अरब इमिरेट्सको अबु धावीमा कात्तिक १२ देखि १६ गते सम्म आयोजना गरेको विश्व सम्मेलनमा नेपालका सिनियर कन्सल्टेन्ट इन्डोयुरोलोजिष्ट डा.सञ्जय खड्गीले कार्यपत्र प्रस्तुत गरेका हुन् ।
डा. खड्गी मूत्र प्रणाली रोग उपचारमा उत्कष्ट प्रविधि मिनी पि.सि.एन.एल.मा तालिमप्राप्त भई उक्त प्रविधिमा विशेषज्ञता राख्ने नेपालका पहिलो इण्डोयुरोलोजिष्ट हुन् । नेपालमा मिनी पि.सी.एन.एल प्रविधिबाट उनले गर्दै आएका मूत्रप्रणालीको पत्थरी रोगको उपचारबारे सम्मेलनमा जानकारी गराउन अन्तर्राष्ट्रिय अतिथि वक्ताका रुपमा आमन्त्रित गरिएको थियो । मूत्र प्रणाली रोग विशेषज्ञमध्ये यो सम्मान नेपाली चिकित्सा इतिहास मै पहिलोपटक प्राप्त भएको हो । सम्मेलनमा मूलतः इण्डोयुरोलोजिकल, ल्यापारोस्कोपिक, रोबोटिक (रोबोटको सहायताले गरिने शल्यक्रिया) र उपचारमा विकसित अन्य नवीनतम् प्रविधिलगायत उपचारमा अपनाइने चिकित्सा व्यवस्थापनबारे वृहत् छलफल गरिएको थियो । साथै एकअर्काबीच अनुभव साटासाट भएको थियो । सम्मेलनमा विश्वभरका मूत्ररोग विशेषज्ञ, रेजिडेण्ट, विशेषज्ञता हासिल गर्दै गरेका चिकित्सकहरू सहित एक हजार भन्दा बढीले सहभागीता जनाएका थिए ।
के हो मिनी पि.सि.एन.एल. ?
मिनी पि.सि.एन.एल मिर्गौला र मूत्र प्रणालीको असामान्य ठूलो र जटिल पत्थरीको उपचारामा प्रयोग हुने प्रविधि हो । यो तुलनात्मकरुपमा सुरक्षित, भरपर्दो, विना ठूलो चिरफार उपचार गर्न सकिने (अर्थात दागरहित) प्रविधि हो । यसको प्रयोगबाट विरामीमा रगतको क्षति अत्यन्तै न्यून हुने, दुःखाई कम हुने, घाउ चाँढै निको हुने, प्रायः सबै पत्थरी हटाउन सकिने र बिरामीको हस्पिटल बसाई पनि निकै कम हुने हुँदा यो प्रविधि विश्वसनीय रहँदै आएको छ ।
को हुन् डा. खड्गी ?
डा. सञ्जय खड्गीले चिनको ग्वाञ्झाओ युनिभर्सिटी अन्तर्गत मिनिमल इन्भेसिभ सेन्टर अफ ग्वाञ्झाओ मा विश्वमै मिनी पि.सि.एन.एल. विधिका प्रवर्तक÷अग्रणी विशेषज्ञ प्रा.डा. चेङ्ग गू.हूसँग इण्डोयुरोलोजी र मिनी पि.सि.एन.एल. विधिमा विशेषज्ञ तालिम लिएका हुन् । उनले नेपालमा सन् २००५ मा मिनी पि.सि.एन.एल. प्रविधि र सन् २०१० मा प्रोस्टेटको उपचारका लागि लेजर प्रविधि पहिलोपटक भित्र्याएका थिए । डा. खड्गीले हालसम्म मूत्र प्रणालीका जटिल पत्थरीका ३ हजार ८ सय भन्दा बढी सफल उपचार गरिसकेका छन् । उनले लेजर विधिबाट करिव २ सय भन्दा बढी प्रोस्टेट रोगको उपचार गरिसकेका छन् ।
केहि समयअघि दुबईमा आयोजित पत्थरी रोग सम्बन्धी ५५ राष्ट्रका विशेषज्ञहरु सम्मिलित पहिलो अन्तर्राष्ट्रिय गोष्ठीमा डा. खड्गीले सर्वोत्कृष्ट पोस्टर प्रस्तुतकर्ताको पुरस्कार समेत हात पारिसकेका छन् ।
