स्वास्थ्यमा समायोजन उल्झन, स्वास्थ्यकर्मीको माग सम्बोधन हुने गरी कार्यविधि आएन !
२०७७, १६ फाल्गुन आईतवार १५:०९ मा प्रकाशित
जनस्वास्थ्य सरोकार, काठमाडौं । स्वास्थ्य क्षेत्रमा कार्यरत कर्मचारीहरुको समायोजन उल्झन कायम रहेको छ । सरकारको स्वास्थ्यकर्मी समायोजन कार्यविधि बनाएपनि कार्यविधि वैज्ञानिक नभएको भन्र्दै विरोध सुरु भएको छ ।
नेपाल स्वास्थ्यकर्मी संघले स्वास्थ्य तथा जनसंख्या मन्त्रालयले ल्याएको कर्मचारी समायोजन, संशोधन र मिलान कार्यविधि २०७७ प्रति असन्तुष्टि जनाएको छ । कोरोना संक्रमणविरुद्ध दत्तचित्त भएर खटिएका स्वास्थ्यकर्मीको मनोभाव विचलित हुने गरी कार्यविधि ल्याइएको स्वास्थ्यकर्मीहरु बताउँछन् । हालसम्म समायोजनका लागि चार हजार निवेदन दर्ता भएका छन् । तर, पुनः निवेदन माग गरिएको छ ।
संघले जारी गरेको विज्ञप्तिमा भनिएको छ- ‘हाल जारी गरिएको कार्यविधिमा अनुसूची १ र २ मा व्यवस्था गरिएको गाउँपालिका र नगरपालिकामा प्रमुख प्रशासशीय अधिकृतले संयुक्त दस्तखत गर्ने कार्य विश्वव्यापी प्रशासनिक व्यवस्थासँग नमिल्दो र व्यवहारिक रूपमा झन्जटिलो रहेकाले उक्त अनुसूची संशोधन गरी प्रमुख प्रशासकिय अधिकृतको मात्रै दस्तखत हुने व्यस्था गरिनुपर्छ ।’
