क्रिष्टल डायग्नोष्टिक ल्याब र सामाजिक सुरक्षा कोषबीच स्वास्थ्य सेवा प्रवाह सम्बन्धि सम्झौता
२०७९, ३ भाद्र शुक्रबार १८:४३ मा प्रकाशित
जनस्वास्थ्य सरोकार, काठमाडौं । अन्तर्राष्ट्रिय गुणस्तर प्रमाण १५१८९ मान्यता प्राप्त ‘क’ वर्गको अत्याधुनिक क्रिष्टल डायग्नोष्टिक ल्याब र सामाजिक सुरक्षा कोषबीच स्वास्थ्य सेवा प्रवाह सम्बन्धि सम्झौता भएको छ ।
सामाजिक सुरक्षा कोषका निर्देशक उत्तम राज नेपाल र क्रिष्टल डायग्नोष्टिकका प्रबन्ध निर्देशक रबीन्द्र केसीबीच स्वास्थ्य सेवा प्रवाहसम्बन्धि सम्झौतामा हस्ताक्षर भएको हो ।
काठमाडौंको सिनामंगलस्थित क्रिष्टल डायग्नोष्टिकले सो सम्झौतापश्चात् कोषमा लगातार तीन महिना भन्दा बढी योगदान पुर्याइरहेका योगदानकर्ताहरुको सामाजिक सुरक्षा योजना सञ्चालन कार्यविधी, २०७५ मा उल्लेख भएअनुसार सेवाहरु प्रदान गर्नेछ । जसमा चिकित्सक परामर्श, अस्पताल भर्ना तथा शल्यक्रिया, रोगको परीक्षण तथा उपचार सेवा र औषधी प्रदान गर्नेछ । यसैगरी, योगदानकर्ता एवं योगदानकर्ताको श्रीमतीको नियमित गर्भ परीक्षण, अस्पताल भर्ना, शल्यक्रिया तथा तीन महिनासम्म शिशुको स्याहार र अस्पताल भर्ना नभएको तर अस्पताल आवातजावत गर्न नसक्नेलाई घरमै गएर प्रदान गरेको परामर्श सेवा, दुर्घटना तथा अपांगता सुरक्षा योजनाअन्तर्गतको उपचार सम्बन्धी सेवा प्रदान गर्नेछ । कोषले अस्पताल भर्ना भएर उपचार गर्नुपर्ने योगदानकर्तालाई वार्षिक रुपमा एक लाख रुपियाँसम्म, प्रसुति तथा नवजात शिशुको उपचारमा १ लाखसम्म, अस्पताल भर्ना नभएर उपचार गर्नुपर्ने योगदानकर्तालाई चिकित्सकको प्रेस्क्रीप्सन बमोजिम वार्षिक रुपमा बढीमा २५ हजार रुपैयाँ नबढ्ने गरी ८० प्रतिशत शुल्क उपलब्ध गराउनुपर्नेछ ।
२० प्रतिशत शुल्क भने बिरामी आफैले व्यहोर्नेछन् ।
स्वास्थ्य सेवा सञ्चालन गर्न छनोट भएका स्वास्थ्य संस्थाहरुसँग सम्झौता गरिरहेको वर्तमान अवस्थामा कोषले पहिलोपटक निजी क्षेत्रको ल्याव क्रिष्टल डायग्नोष्टिक प्रा.लि.सँग सम्झौता शुरु गरेको बताइएको छ ।
बिहीबार भएको सम्झौता समारोहमा सामाजिक सुरक्षा कोषका प्रशासकीय अधिकृत ऋषिराम पाण्डेय र किष्टलका प्रमुख कार्यकारी अधिकृत सुनिल राउतकोसमेत उपस्थिति रहेको थियो ।
