स्वास्थ्य वैज्ञानिकहरुको नवौं राष्ट्रिय शिखर सम्मेलन सम्पन्न, बेस्ट हेल्थ रिसर्चर अवार्ड डा. शिवराज मिश्रलाई प्रदान, कसलाई कुन अवार्ड ?
२०७९, ३० चैत्र बिहीबार १४:२७ मा प्रकाशित
जनस्वास्थ्य सरोकार, काठमाडौँ । स्वास्थ्य तथा जनसंख्या वैज्ञानिकहरुको नवौं राष्ट्रिय शिखर सम्मेलन सम्पन्न भएको छ ।
सम्मेलनमा विभिन्न विधामा उत्कृष्ट कार्य गर्ने व्यक्तिहरुलाई अवार्ड प्रदान गरिएको छ ।
यसवर्ष बेस्ट हेल्थ रिसर्चर अवार्डबाट डा. शिवराज मिश्र सम्मानित हुनुभएको छ । त्यस्तै बेस्ट ओरल प्रेजेन्टेसन अवार्डबाट विजय खत्री र बेस्ट पोस्टर प्रेजेन्टेसन अवार्डबाट सिता कोइराला सम्मनित हुनुभएको छ ।
त्यसैगरी मृगेन्द्र सम्झना मेडिकल ट्रष्ट युवा स्वास्थ्य अनुसन्धानकर्ता अवार्ड डा. रविनमान कर्माचार्यलाई प्रदान गरिएको छ । त्यस्तै मृगेन्द्र सम्झना मेडिकल ट्रस्ट योङ हेल्थ रिसर्च अवार्ड (एनएचआरसी स्टाफ क्याटागोरी) नमिता घिमिरेलाई प्रदान गरिएको छ ।
एनएचआरसीका कर्मचारीबाट बेस्ट परफरमेन्स अवार्ड परिषद्का मिन बहादुर घिसिङलाई प्रदान गरिएको छ ।
कार्यक्रमका प्रमुख अतिथिका उपप्रधान तथा गृह मन्त्री नारायण काजी श्रेष्ठले उहाँहरुलाई अवार्ड वितरण गर्नुभएको थियो ।
परिषद्ले यही चैत २८ र २९ गते ‘स्वास्थ्यका लागि अनुसन्धानः कार्यान्वयनका लागि तथ्य र अन्वेषण’ भन्ने नाराका साथ स्वास्थ्य तथा जनसंख्या वैज्ञानिकहरूको नवौं राष्ट्रिय शिखर सम्मेलन आयोजना गरेको थियो ।
सम्मेलनमा स्वास्थ्य तथा जनसंख्या क्षेत्रका स्वदेशी तथा विदेशी वैज्ञानिकहरुले विभिन्न ७ विधाका १३७ वटा मौखिक प्रस्तुतिकरण र ६४ वटा पोष्टर प्रस्तुतिकरण गरेका थिए ।
