हेलिकप्टरमार्फत गर्भवती महिलाको उद्धार
२०८०, ५ बैशाख मंगलवार १६:१६ मा प्रकाशित
जनस्वास्थ्य सरोकार, काभ्रेपलाञ्चोक । काभ्रेपलाञ्चोकको विकट महाभारत गाउँपालिका वडा नम्बर ५ बाट आज एक जना गर्भवती महिलाको हेलिकप्टर मार्फत उद्धार गरिएको छ ।
जिल्लाको बुढाखानी बर्थिङ सेन्टरमा प्रसूति गराउन नसकिने भएपछि २० वर्षीय गर्भवती सुमिका घलानलाई हेलिकप्टरमार्फत उद्धार गरिएको हो । घलानलाई आजै मात्र बुढाखानी बर्थिङ सेन्टरमा भर्ना गरिएको थियो ।
निरन्तर रगत बगिरहेका कारण बर्थिङ सेन्टरमा उपचार सम्भव नभएपछि हेलिकप्टरमार्फत सुमिकाको उद्धार गरिएको महाभारत गाउँपालिका अध्यक्ष कान्छालाल जिम्बाले जानकारी दिनुभयो ।
गर्भवती घलानलाई राष्ट्रपति महिला उत्थान कार्यक्रम अन्तर्गत निःशुल्क हेलिकप्टर मार्फत उद्धार गरिएको बताइएको छ । यो कार्यक्रम अन्तर्गत उद्धार गरिएका महिलाको उपचार थापाथली स्थित परोपकार प्रसूति गृह तथा स्त्री रोग अस्पतालमा उपचार गर्ने व्यवस्था मिलाइएको छ ।
महाभारत गाउँपालिकाबाट यसअघि सुत्केरी र गर्भवती गरी ८ जना महिलाको हेलिकप्टर मार्फत उद्धार गरिएको गाउँपालिका अध्यक्ष कान्छालाल जिम्बाले बताउनुभयो ।
