नेपाल हेल्थ न्युज काठमाडौं । साउनको अन्तिम दिन थियो । साँझ करिब ६ बजेतिर क्यान्सर विशेषज्ञ डा. अरुण शाहीलाई भेट्न यो स्तम्भकार नर्भिक हस्पिटल पुगेको थियो । उहाँले ओपिडीका बिरामी जाँच गरिसकेर दुईजना मेडिकल रिप्रिजेन्टेटिभ (एमआर) लाई क्यान्सरको इभिडेन्स बेस प्राक्टिसका बारेमा बताइरहनुभएको थियो ।
संजितको जन्मदिनमा डा. अरुण शाही
एकछिनपछि चिया पिउन हामी बाहिर निस्कियौं । तर डाक्टरसँग अर्जेन्ट काम भएकाले चिया पिउन क्यान्टिन छिरेनौं । एमआरलाई बिदा गरेर पुनः डा. अरुण र म उहाँको चेम्बरमा फर्कियौं ।
डा. अरुणसँगको एकछिनको भलाकुसारी पछि करिब ६.४५ बजेतिर तेस्रो तलामा भर्ना भएका एकजना क्यान्सरका बिरामीको जन्मदिन मनाउने निम्तो आयो । डा. अरुणको आग्रहमा म पनि गएँ । ललितपुर महानगरपालिका सुनाकोठी २७ का संजित थापाको जन्म दिन रहेछ । उहाँ ४४ वर्ष पुग्नुभएछ । उहाँ अस्पताल भर्ना भएर ठूलो आन्द्राको कोलोन क्यान्सरको उपचार गरिरहनुभएको छ ।
जन्मदिनमा आमा रमा थापा, श्रीमती सुनि थापा, कान्छो छोरा लाभांश थापालगायत एकदुइजना अन्य आफन्तको पनि उपस्थिति देखेँ । केक तयारी अवस्थामा राखिएको थियो । डा. अरुण पुगेपछि केक काटियो । डा. अरुण निकै ह्याप्पी देखिनुहुन्थ्यो । शुभकामना आदानप्रदान भयो । हामीले क्यान्सर विशेष अंकको २ वटा जनस्वास्थ्य सरोकार मासिक पत्रिका उपहार दियौं । यसपाली साउन ३२ को महिना परेकाले संजित थापाले ३ वर्षपछि मात्र जन्मदिन मनाउन पाउनुभएको थियो । प्रायः ३२ गते जन्मनेहरुले जन्मदिन दिन मनाउन वर्षौं पनि कुर्नुपर्छ ।
संजितका आमा, श्रीमती र २ वटा छोरा छन् ।
बिरामी छोरालाई जन्मदिनमा के आशिर्वाद दिनुहुन्छ भन्ने प्रश्नमा ६३ वर्षीया आमा रमाले आँखाभरी आँशु बनाएर भक्कादिँदै भन्नुभयो—‘मेरो छोराको उपचार सफल होस् । छोराको काखमा मर्न पाऊँ’ ।
श्रीमती सुनीले भन्नुभयो— ‘जानकारी गराएर रोग आउने रहेनछ । जे जस्तो समस्या आउँछ, त्यसको अगाडि हामीले लड्दै जानुपर्छ । समस्यामा आत्तिएर मनोबल गिराउन हुँदैन । जीवन एउटा संघर्ष हो पलपलमा इन्ज्वाई गर्नुपर्छ र पलपलमा बाँच्नुपर्छ ।’ बाबाको जन्मदिनमा के शुभकामना दिन्छौ भनेर छोरा लाभांशलाई पनि सोधेका थियौं । उहाँले भन्नुभयो—‘बाबाको मनोबल उच्च छ । बाबाले क्यान्सरलाई ढाल्नसक्नुहुन्छ । क्यान्सर रोएर जान्छ ।’
उनी धापाखेलको रिजेन्ट रेसिडेन्टल स्कुलमा कक्षा १० मा अध्ययन गर्छन् ।
डा. अरुण भन्नुहुन्छ—‘अहिले संजितको कोलोन क्यान्सर तेस्रो चरणमा छ । उहाँको शल्यक्रिया राम्रो भएको छ । क्योर हुन्छ । अब १२ पटक किमो लगाउनुपर्छ । त्यसपछि यो निर्मुल हुन्छ । यसले ज्यान लिँदैन र आत्तिन पर्दैन ।’
यो रोग करिब ६० वर्ष भन्दा माथिकालाई हुने गर्छ । यो उमेरमा उहाँलाई हुनु व्याड लक भएको डा. अरुणले बताउनुभयो ।
कोलोन क्यान्सरको संकेत डा. अरुणका अनुसार, ठूलो आन्द्राको क्यान्सरमा ज्वरो आउने समस्या त हँुदैन । तर ढाड दुख्ने, दिसा कब्जियत हुने, पातलो दिसा आउने, पेट दुख्ने, वजन घट्दै जाने हुनसक्छ । पहिला उहाँलाई पनि त्यस्तै भएको थियो होला । ख्याल नगरिएको हुनसक्छ ।
संजितलाई २ महिनाअघि १०४ डिग्री ज्वरो आएको थियो । सिटामोल खाँदा पनि ज्वरो घटेन । ढाड पनि दुखेको थियो । नेपाल मेडिसिटीमा ३ दिन भर्ना हुनुभयो । त्यसको एक महिनापछि कोलोनोस्कोपी गर्दा ठूलो आन्द्राको कोलोन क्यान्सर पहिचान भयो । अहिले करिब अढाई महिनादेखि नर्भिकमा डा. अरुणसँग उपचार गराइरहनुभएको छ । अहिले आफूलाई पनि निकै कम्फर्टेवल भइरहेको संजितले बताउनुभयो ।
