सुत्केरी प्याकेजबाट २२ महिला लाभान्वित
२०७४, १६ माघ मंगलवार ०५:०४ मा प्रकाशित
इलाम नगरपालिकाले चालू आवको छ महिनाको अवधिमा २२ जना आमाहरुलाई सुत्केरी सुविधा प्याकेज उपलब्ध गराएको छ ।
सुत्केरी सुविधाको प्याकेजमा एक किलोग्राम घ्यू, एक पावा ज्वानो, एक किलोग्राम सखर, एक किलोग्राम मिश्री, सुत्केरी आमा र बच्चाको लागि एक/एक थान ब्ल्याङ्केटसहित रु दुई हजार बराबरको जिन्सी सामग्री उपलब्ध गराइएको प्रशासकीय अधिकृत शाहले जानकारी दिनुभयो ।
प्रथम नगरसभाबाट स्वीकृत आव २०७४/०७५ को बजेट तथा कार्यक्रम अनुसार सुत्केरी महिलालाई दिइने सुत्केरी सुविधाबाट इलाम नगरपालिका क्षेत्रका २२ जना महिला लाभान्वित भएका हुन् ।
सुत्केरी सुविधा प्राप्त गर्नका लागि इलाम नगरपालिका क्षेत्रमा स्थायी बसोबास भएको हुनुपर्ने, बच्चाको जन्मदर्ता भएको हुनुपर्ने, सुत्केरी सुविधा प्रत्येक वडाको महिला सदस्यले सिफारिश गरेपछि मात्र पाउने र सुत्केरी भएको एक महिनाभित्रमा सुविधा लिई सक्नुपर्ने प्रावधान रहेको नगरपालिकाले जनाएको छ । यसो गर्दा बालबालिकाको तत्काल जन्मदर्तासमेत सुनिश्चित हुने इलाम नगरपालिकाका प्रशासकीय अधिकृत रामकुमार शाहले बताउनुभयो ।
इलाम नगर कार्यपालिकाको गत साउन ५ गते सम्पन्न पहिलो बैठकको निर्णयानुसार इलाम नगरपालिकामा विगतमा उपलब्ध गराइएको सुत्केरी सुविधा कार्यक्रमलाई पुनः उपलब्ध गराउने निर्णयअनुरुप सुत्केरी महिलालाई प्याकेज प्रदान गरिएको हो । रासस
