गाएब भएका स्वास्थ्य प्रमुख साह कार्यालयमा हाजिर

राष्ट्रिय समाचार समितिबाट मङ्सिर ५ गतेका दिन महोत्तरी जिल्लाको एकडारा गाउँपालिका–५ मा अवस्थित कोल्हुवा बगेया स्वास्थ्य चौकीका स्वास्थ्य प्रमुख (स्वास्थ्य सहायक) चन्दनकुमार साह विगत २० दिनदेखि अचानक गायब रहेको समाचार आएपछि उनी कार्यालयमा हाजिर भएका छन् ।

स्वास्थ्य प्रमुख साह २० दिनसम्म स्वास्थ्य चौकीमा नआएको तथा उनी कहाँ कुन अवस्थामा रहेको बारेमा कसैलाई कुनै जानकारी नगराएको बताउँदै सो वडाका वडाध्यक्ष शेराजुद्दिन अन्सारीले राससकर्मीलाई जानकारी गराएपछि प्रकाशित भएको सो समाचारकै प्रभावले स्वास्थ्य सहायक साह हाजिर भएको बताउनुभयो ।

स्वास्थ्य सहायक साहले आफू मौखिक रुपमा स्वास्थ्य संयोजक श्यामदेव महासेठलाई जानकारी गराएर अचानक घरायसी कामकाजको सिलसिलामा कार्यालय छोडेर जानु परेको बताउनुभयो । तर लिखित रुपमा बिदा वा अन्य कुनै कुरा कसैलाई भन्न नसक्दा वडाध्यक्ष तथा आफ्नै साथीहरुले पनि आफू गायब भएको सञ्चारकर्मीलाई बताएको उहाँले स्पष्ट पार्नुभयो ।

स्वास्थ्य सहायक साहले आफू राससबाट समाचार प्रकाशित भएपछि तत्काल कार्यालयका लागि हिँडिहालेको र अहिले आफू कार्यालयमा नियमित रहेको बताउनुभयो । दैनिक ७०÷८० जना बिरामी उपचारका लागि आउने गरेका त्यस स्वास्थ्य चौकीमा स्वास्थ्य प्रमुख साह गायब रहेको अवस्थामा उपचार सेवा प्रभावित भएको थियो ।

साथै स्वास्थ्य प्रमुख साहको अनुपस्थितिले गर्दा त्यस स्वास्थ्य चौकीमा अन्य कर्मचारीहरु पनि नियमित नआउने र औषधिसहित बिरामीका लागि चाहिने अन्य आवश्यक वस्तुको अभावको अवस्था समेत सृजना भएकाले बिरामीहरुलाई निक्कै सास्ती व्यहोर्नुपरेको वडाध्यक्ष अन्सारीले बताउनुभयो ।

स्वास्थ्य प्रमुख साहको अनुपस्थितिमा त्यस स्वास्थ्य चौकीमा बिरामीको चेकजाँच भएको थिएन भने त्यहाँ कार्यरत अनमीहरुले रोगको लक्षणको आधार र अन्दाजकै भरमा औषधि दिने गरेका थिए । रासस