बुबाको स्मृतिमा स्वास्थ्य शिविर

पुथाउत्तरगंगा गाउँपालिका–१० तकसेरा घर भई अमेरिका बस्दै आएका जोर्डन बुढाले आफ्ना बुबा हीरा बुढाको स्मृतिमा निःशुल्क स्वास्थ्य शिविर सञ्चालन गरेका छन् । बुढाले जापनिज डाक्टरसहितको टोली ल्याएर गाउँमा तीन दिनसम्म स्वास्थ्य शिविर सञ्चालन गरेका हुन् ।
शिविरमा जापनिज डाक्टर इसिदा रुइचिकासहित ६ जना डाक्टर, ६ जना स्टाफ नर्स र अन्य स्वास्थ्यकर्मी गरी १६ जनाको टोली खटिएको थियो ।

शिविर सञ्चालन गर्दा करिब १८ लाख रुपैयाँ खर्च भएको बुढाले बताए । ‘दुर्गमका नागरिकले गाउँमै सहज स्वास्थ्य सेवा पाऊन् भनेर शिविर सञ्चालन गरेका हौँ,’ बुढाले भने । शिविरमा दुई हजारले स्वास्थ्य परीक्षण तथा उपचार सेवा लिएका छन् । शिविरमा भिडियो एक्सरेसहित, औषधि र ल्याब सेवासमेत निःशुल्क प्रदान गरिएको शिविरमा खटिएका डाक्टर अनिल बुढामगरले जानकारी दिए ।

 महिलामा आङ खस्ने समस्या धेरै
शिविरमा उपचारका लागि आएका महिलामा आङ खस्ने समस्या धेरै पाइएको छ । ‘महिलाहरूले आफ्नो स्वास्थ्यमा ख्याल नगरेको पाइयो,’ डाक्टर बुढाले भने, ‘धेरै महिला त स्वास्थ्य समस्या देखिँदा पनि उपचारका लागि स्वास्थ्य संस्थामा नगएका रहेछन् ।’

नयाँ पत्रीकाबाट