काममा फर्किए चिकित्सक
बीपी कोइराला स्वास्थ्य विज्ञान प्रतिष्ठानको व्यस्थापन पक्षसँग सात बुँदे सहमतिपछि आन्दोलन स्थगित गर्दै इन्टर्न चिकित्सकहरू काममा फर्किएका छन् ।
उनीहरू एकसातादेखि उपकुलपति परिसरमा धर्ना बसेका थिए । इन्टर्न चिकित्सकले काम छाडेर धर्नामा बस्दा कन्सल्ट्यान्ट र सिनियर चिकित्सकले मुस्किलले धानेका थिए । प्रतिष्ठानले गठन गरेको वार्ता समिति र इन्टर्न संघर्ष समितिबीच आइतबार दिनभरको वार्ता भएपछि राती ८ बजे मात्र सहमतिभएको थियो ।
इन्टर्न चिकित्सकले प्रतिष्ठानबाट हाल मासिक ११ हजार ८ सयरुपैयाँ छात्रवृत्ति पाउँदै आएकोमा १५ हजार रुपैयाँ दिने, महंगी वृद्धि भएकाले सोही १५ हजार रुपैयाँको ३ प्रतिशत रकम मासिक रूपले थपिदिने, रात्रिकालीन ड्युटीमा खट्नेलाई नियमअनुसार खाजा भत्ता उपलब्ध गराउने र भविष्यमा शिक्षण अस्पताल (आइओएम) मा हुने वृद्धिलाई आधार मानेर प्रतिष्ठानले पनि इन्टर्नको हकमा पनि छात्रवृत्ति वृद्धि गर्ने सहमति भएको संघर्ष समितिका संयोजक डा संजय बरालले बताए ।
सहमतिपत्रमा प्रतिष्ठानका उपकुलपति राजकुमार रौनियार, अस्पताल निर्देशक प्रा डा गौरीशंकर साह, शैक्षिक डिन चन्द्रभूषण झा र इर्न्टन संघर्ष समितिका तर्फबाट डा संजय बराल, डा जनक अधिकारीलगायतले हस्ताक्षरगरेका छन् ।
चिकित्सक र कर्मचारीले तलब पाएनन्
मोरङ– विराटनगरस्थित कोसी अस्पतालमा कार्यरत ६० जना चिकित्सक, स्वास्थ्यकर्मी तथा कर्मचारीले माघदेखि तलब पाउन सकेका छैनन् ।
मातृ शिशु तथा पोषण इकाई, कुष्टरोग इकाई र लागु औषध इकाईमा काम गर्ने प्रदेश सरकार मातहतका कर्मचारीले तलब नपाएका हुन् । संघीय संरचनाअन्तर्गत सुरुमा प्रदेश मातहत रहेको कोशी अञ्चल अस्पताललाई पछि संघीय सरकारले आफ्नो मातहत लिएको छ । संघीय सरकारले अस्पतालको स्तर वृद्धि गरी अहिले कोसी अस्पताल नामकरण गरेको छ ।
संघीय सरकारले यस अस्पताललाई ‘टरसरी अस्पताल’ मा स्तरोन्नति गरेको अस्पताल प्रमुख डा. रोशन पाखरेलले बताए । ‘कर्मचारी समायोजनका क्रममा यो अस्पताल प्रदेश मातहत रहेकाले यहाँ कार्यरत चिकित्सक तथा कर्मचारीले प्रदेशमा समायोजनका लागि आवेदन गरेको र त्यही अनुसार भएको छ,’ उनले भने, ‘अस्पताल संघीय सरकार मातहत गएपछि प्रदेश सरकारले बजेट नदिएकाले प्रदेश मातहत समायोजन भएका कर्मचारीले तलबभत्ता पाउन सकेका छैनन् ।’