कर्णाली स्वास्थ्य विज्ञान प्रतिष्ठान अस्पतालको निर्देशकमा डा. रावल
जनस्वास्थ्य सरोकार, काठमाडौँ । हाडजोर्नी विशेषज्ञ डा. मंगल रावल कर्णाली स्वास्थ्य विज्ञान प्रतिष्ठान जुम्लाअन्तर्गत अस्पतालको निर्देशक नियुक्त भएका छन्। प्रतिष्ठानका उपकुलपति प्रा. डा. राजेन्द्र वाग्लेले मंगलबारकै मितिबाट कार्यभार सम्हाल्नेगरी डा. रावललाई नियुक्त गरेका हुन्। प्रतिष्ठान ऐनको दफा २५ को उपदफा १ र २ बमोजिम काम कर्तव्य र अधिकारसहित उनलाई ‘अस्पताल निर्देशक’को जिम्मेवारी दिइएको प्रतिष्ठानले जनाएको छ। चार वर्षदेखि हाडजोर्नीको विशेषज्ञको रुपमा कार्यरत डा. रावल यसअघि प्रतिष्ठानको हाडजोर्नी विभागका प्रमुख थिए । सोही प्रतिष्ठानको सिनेट सदस्य समेत रहेका उनी यसअघि कर्णाली प्रदेश सरकारले गठन गरेको प्रदेश स्वास्थ्य नीति तयारी समितिको सदस्य रहेका थिए । जिम्मेवारी पाएपछि डा रावलले आफ्नो शीप र क्षमताले भ्याएसम्म अस्पताल सेवालाई स्तरीय, सुलभ र विश्वनीय बनाउन लागि पर्ने बताए ।