Logo
|
Monday 19th April 2021
E-paper Magazine

मनाङमा भेटिएका एक मात्र संक्रमित डिस्चार्ज, मनाङ हाललाई कोरोना मुक्त



जनस्वास्थ्य सरोकार, काठमाडौँ ।५७ वर्षीय पुरुष डिस्चार्ज भएसँगै हाललाई हिमाली जिल्ला मनाङ कोरोना संक्रमण मुक्त  भएको छ । मनाङमा भेटिएका एक मात्र संक्रमित सोमबार निको भएर घर फर्किएसँगै यस जिल्लामा अन्य संक्रमित फेला परेका छैनन् ।

कोरोना भाइरस संक्रमण पुष्टि भएको ११ औं दिनमा उनी घर फर्किएका हुन् । जिल्ला अस्पताल मनाङको आइसोलेसनमा उपचाररत उनी निको भएर घर फर्किएको स्वास्थ्य कार्यालय मनाङका प्रमुख बद्री आचार्यले बताए । ११ दिनको उपचारपछि पिसिआर परीक्षण गर्दा कोरोना नेगेटिभ आएसँगै उनलाई डिस्चार्ज गरिएको आचार्यले बताए।

कपिलबस्तुको वाणगंगा स्थायी घर भई मनाङमा कार्यरत ५७ वर्षीय पुरुषमा मात्र कोरोना भाइरस देखिएको थियो । अहिलेसम्म मनाङमा अन्य कुनैपनि मानिसमा कोरोना संक्रमण पुष्टि भएको छैन ।

यद्यपि उनलाई दुई हप्ता होम क्वारेन्टाइनमा बस्न अनुरोध गरिएको छ । मनाङमा ३० जनाको पिसिआर परीक्षण गरिएकोमा एक जनाको रिपोर्ट पोजेटिभ र २९ जनाको रिपोर्ट नेगेटिभ आएको स्वास्थ्य कार्यालय मनाङका प्रमुख आचार्यले बताए ।

हालसम्म मनाङमा एक सय ६७ जनाको आरडिटी परीक्षण गरिएको छ । मनाङमा निर्माण गरिएको ९३ बेड क्षमताको क्वारेन्टाइन र ७ बेडको आइसोलेसनमा हाल कोहि पनि नभएको जिल्ला प्रशासन कार्यालय मनाङले जनाएको छ । मनाङमा निर्माण गरिएका सबै आइसोलेसन र क्वारेन्टाइन अहिले खाली छन् ।

प्रतिक्रिया दिनुहोस्