कोरोनाविरुद्धको २४ लाख डोज खोप नहराएको छानबिन समितिको निष्कर्ष
२०७८, ३ फाल्गुन मंगलवार १५:४४ मा प्रकाशित
जनस्वास्थ्य सरोकार, काठमाडौँ । कोभिड–१९ विरुद्ध २४ लाख मात्रा खोप हराएको भनिएको घटना छानबिन गर्न बनेको समितिले खोप नहराएको निष्कर्ष निकालेको छ ।
स्वास्थ्य मन्त्रालयका विशेषज्ञ चिकित्सक डा गुणराज लोहनी संयोजकत्वमा रहेको समितिले उक्त निष्कर्षसहितको प्रतिवेदन स्वास्थ्य तथा जनसंख्यामन्त्री विरोध खतिवडालाई बुझाएको छ ।
छानबिन समितिले धेरै स्थानबाट खोप लगाएकाको विवरण अध्यावधिक गर्न बाँकी रहेकाले तथ्यांक फरक देखिएको निष्कर्ष निकालेको प्रतिवेदनमा उल्लेख छ ।
समितिले माघ सबै प्रदेश जिल्ला तथा पालिकालाई प्राप्त खोप, लगाइएको र खेर गएको खोपको विवरण अध्यावधि गर्न भनेको थियो।
संसदीय समितिमा स्वास्थ्य सचिव रोशन पोखरेलले २४ लाख डोज खोप हराएको बताएपछि विवाद निम्तिएको थियो । समितिले छानबिनको लागि दुई साताको समय पाएको थियो । उक्त प्रतिवेदनलाई पत्रकार सम्मेलनमार्फत मंगलबार सार्वजनिक गरिने स्वास्थ्यमन्त्रीको सचिवालयले जानकारी दिएको छ ।
