वीरेन्द्रनगरबाट नक्कली चिकित्सक पक्राउ
जनस्वास्थ्य सरोकार, सुर्खेत । सुर्खेतको वीरेन्द्रनगरबाट एक जना नक्कली चिकित्सक पक्राउ परेका छन् । पक्राउ पर्नेमा वीरेन्द्रनगर नगरपालिका–६ स्थित समाज डेन्टल केयर क्लिनिकका सञ्चालक २२ वर्षीय डिलबहादुर महतारा रहेको जिल्ला प्रहरी कार्यालय सुर्खेतका डीएसपी एवं सूचना अधिकारी सुरज कार्कीले जानकारी दिनुभयो ।
वीरेन्द्रनगरकै एक महिला दाँत दुख्ने समस्या लिएर महताराको क्लिनिकमा जानुभएको थियो । महताराले दुख्ने दाँत निकाल्नुपर्ने सुझाव दिएपछि उहाँ दाँत निकाल्न राजी हुनुभयो । यद्यपि महताराले दुख्ने दाँतसहित अर्को दाँत पनि निकालिदिए । त्यसपछि महिलाले नक्कली डाक्टर भएको आशांकासहित प्रहरी कहाँ उजुरी गरेको कार्कीले बताउनुभयो । सोही उजुरीको आधारमा उहाँलाई पक्राउ गरिएको कार्कीेले जानकारी दिनुभयो ।
‘अनुसन्धानका क्रममा महताराले आफू चिकित्सक नभएको स्वीकार गरेका छन्,’ कार्कीले भन्नुभयो । महातारा जाजरकोटको शिवालय गाउँपालिका वडा नम्बर १ का बासिन्दा हुन् ।