सिभिल अस्पताल नेपाल-चीनबीचको घनिष्ट सम्बन्ध र आर्थिक सहयोगको प्रतिक: प्रधानमन्त्री दाहाल
२०८०, १५ बैशाख शुक्रबार १४:०० मा प्रकाशित
जनस्वास्थ्य सरोकार, काठमाडौँ । प्रधानमन्त्री पुष्पकमल दाहाल ‘प्रचण्ड’ले सिभिल अस्पताललाई नेपाल चीनबीचको गहिरो र घनिष्ट सम्बन्ध तथा आर्थिक सहयोगको प्रतिकको रुपमा लिनुपर्ने बताउनुभएको छ ।
शुक्रबार काठमाडौँमा चीन सरकारले निर्माण गरेको निजामति कर्मचारी अस्पतालको नयाँ सर्जिकल भवन र पुरानो भवनका पुनर्निर्माणसहितको हस्तान्तरण समारोहमा बोल्नुहुँदै प्रचण्डले सो कुरा बताउनुभएको हो ।
उहाँले भन्नुभयो–‘नेपाल चीनबीच मैत्रीपूर्ण, सोहार्दपूर्ण र सहयोगी सम्बन्धको लामो इतिहास छ । नेपाल र चीनबीचको आर्थिक, सास्कृतिक र जनताबीचको आदानप्रदानको इतिहास अनादिकालदेखि नै रहेको छ। मित्रता पारस्परिक सम्मान, समझदारी र एकअर्काको जायज चासो र संवेदनशीलताको कदरले हाम्रो असल छिमेकी सम्बन्धलाई आधार बनाउँछ । हाम्रा दुइ सरकार र जनताको हितमा यी सम्बन्धहरु बढ्दै र विस्तार हुँदै गएकोमा हामी खुशी छौँ ।’
धानमन्त्री दाहालले प्रविधि हस्तान्तरण र विशेष अस्पतालहरू विकास लगायतका स्वास्थ्य क्षेत्रका विषयहरूमा नेपाल र चीनबीच थप सहकार्य हुने विश्वास व्यक्त गर्नुभयो ।
निजामती अस्पतालले स्तरोन्नति परियोजना मार्फत पूर्वाधार र सुविधाको विस्तार र स्तरोन्नति गरी बिरामीलाई गुणस्तरीय स्वास्थ्य सेवा उपलब्ध गराउन अस्पताल सक्षम भएको प्रधानमन्त्री दाहालले उल्लेख गर्नुभयो ।
यसैबीच, चीनले ब्लड क्यान्सरको उपचारका लागि अस्पताललाई प्रविधि उपलब्ध गराउन सहमत भएको अस्पताल श्रोतले जनाएको छ ।
