नवनियुक्त स्वास्थ्यमन्त्री मोहन बहादुर बस्नेतद्धारा पद तथा गोपनीयताको शपथ ग्रहण
२०८०, २१ बैशाख बिहीबार १६:४९ मा प्रकाशित
जनस्वास्थ्य सरोकार, काठमाडौं । नवनियुक्त स्वास्थ्य तथा जनसङ्ख्यामन्त्री मोहन बहादुर बस्नेत पद तथा गोपनीयताको शपथ लिनुभएको छ । राष्ट्रपति कार्यालय शीतल निवासमा आज आयोजित विशेष समारोहमा राष्ट्रपति रामचन्द्र पौडेलले उहाँलाई शपथ गराउनुभएको हो ।
पदभार सम्हाल्नु हुँदै स्वास्थ्यमन्त्री बस्नेतले आम नागरिकको स्वास्थ्य उपचार सेवालाई सरलीकृत गर्ने र उपलब्ध साधन श्रोतलाई अधिकतम उपयोग गरी जनताको स्वास्थ्य सेवा प्राप्त गर्ने आधारभूत मानव अधिकारलाई सुनिश्चित गर्ने बताउनुभयो ।
राष्ट्रपति पौडेलले प्रधानमन्त्री पुष्पकमल दाहाल ‘प्रचण्ड’को सिफारिसमा उहाँलाई बुधबार स्वास्थ्य मन्त्री पदमा नियुक्त गर्नुभएको हो । स्वास्थ्य मन्त्री बस्नेत नेपाली कांग्रेसका केन्द्रीय सदस्य हुनुहुन्छ ।
शपथ समारोहमा अवसरमा उपराष्ट्रपति रामसहायप्रसाद यादव, प्रधानमन्त्री दाहाल, सभामुख देवराज घिमिरे, कायममुकायम प्रधानन्यायाधीश हरिकृष्ण कार्की, मन्त्रीहरु, संवैधानिक निकायका प्रमुख, सुरक्षा निकायका प्रमुख, उच्च सरकारी कर्मचारीलगायतको सहभागिता थियो ।
