सहकारीका शेयर सदस्यहरूमा ट्राइग्लेरेसाइड, मधुमेह, मिर्गौला र कलेजोको समस्या उच्च
२०८०, २७ बैशाख बुधबार १२:३२ मा प्रकाशित
जनस्वास्थ्य सरोकार, बुटवल । करिब चार सय जनाको स्वास्थ्य परीक्षण गर्दा ३० प्रतिशतमा ट्राइग्लेरेसाइड (रगतमा चिल्लो पदार्थ) उच्च रहेको पाइएको छ ।
तिलोत्तमा—१ शंकर नगरमा रहेको दिपज्योती बचत तथा ऋण सहकारी संस्थाका शेयर सदस्यहरूमा सो समस्या देखिएको हो ।
सहकारीको आयोजना र केन सेन्टरको प्राविधिक सहयोगमा भएको ३ दिनको निःशुल्क शिविरमा २ प्रतिशतमा मधुमेह, १७ प्रतिशतमा मिर्गौलाबाट उच्च प्रोटिन निस्कने, २० प्रतिशतमा कलेजोमा समस्या भएको पाइएको छ ।
सो अवसरमा निःशुल्क रगत र पिसाको परीक्षण गरिएको थियो ।
केनका अध्यक्ष दिनेश कक्षपतिले समाजमा उच्च समस्याका रूपमा देखापरेको सुगर , मुटु , कलेजो र मिर्गौलाको समस्यालाई बेलामै पत्ता लगाई जीवनशैली सुधार गरेमा समस्याबाट जोगिन सकिने स्पष्ट पार्नुभयो ।
समस्या देखिएकाहरूलाई स्वस्थ्य जीवनशैली र खानपासनसम्बन्धि ३ दिनको परामर्श सेवा पनि सञ्चालन गरिँदै छ ।
‘बचत सँगै स्वास्थ पनि’ भन्ने नाराका साथ भएको सो कार्यक्रमको उद्घाटन तिलोत्तमा नगरपालिका वार्ड नं—१ का अध्यक्ष परशुराम गिरीले गर्नुभएको थियो ।
समापन कार्यक्रममा तिलोत्तमा नगरपालिका २ का निवर्तमान वडा अध्यक्ष एवं दीपज्योति बचत तथा ऋण सहकारीका वरिष्ठ सल्लाहकार दधिराम गौतमले आतिथ्यता ग्रहण गर्नुभएको थियो ।
सहकारीका अध्यक्ष हुमनाथ पाण्डेले रोगबारे सचेत रहन सहकारीका शेयर सदस्यहरूलाई आग्रह गर्नुभयो । सहकारीको स्वास्थ समिति संयोजक झुम प्रसाद थापा, दिपेन्द्र पौडेल र गोविन्द श्रेष्ठको प्रयासमा कार्यक्रम भएको थियो ।
सो अवसरमा सहकारीका सल्लाहहकार जगननाथ कँडेलको पनि उपस्थिति रहेको थियो ।
