विश्व उच्च रक्तचाप दिवस २०२४ः ‘आफ्नो रक्तचाप सही रूपमा मापन गर्नुहोस्, यसलाई नियन्त्रण गर्नुहोस् र लामो समयसम्म बाँच्नुहोस्’
खराब जीवनशैली, असुरक्षित खानपान र शारीरिक क्रियाकलापको कमीका कारण उच्च रक्तचापको समस्या निरन्तर बढ्दै
२०८१, ४ जेष्ठ शुक्रबार १०:०० मा प्रकाशित
’
नेपाल हेल्थ न्युज, काठमाडौं । आज विश्व उच्चरक्तचाप दिवस २०२४ । उच्च रक्तचाप सम्बन्धी जनचेतना अभिवृद्धि र रोकथामका लागि हरेक वर्ष मे १७ मा विश्व उच्च रक्तचाप दिवस मनाइन्छ ।
विश्व उच्च रक्तचाप दिवस विश्व उच्च रक्तचाप लीग (डब्लुएचएल) द्वारा उच्च रक्तचापबारे चेतना जगाउन सुरु गरिएको थियो । डब्लुएचएलले पहिलो विश्व उच्च रक्तचाप दिवस १४ मे २००५ मा सुरु गर्यो । सन् २००६ देखि हरेक वर्ष मे १७ लाई विश्व उच्च रक्तचाप दिवसका रूपमा मनाउने निर्णय भएको थियो ।
विश्व उच्च रक्तचाप दिवस २०२४ को नारा ‘आफ्नो रक्तचाप सही रूपमा मापन गर्नुहोस्, यसलाई नियन्त्रण गर्नुहोस्, लामो समयसम्म बाँच्नुहोस्’ रहेको छ । विश्व उच्च रक्तचाप दिवस २०२४ को नाराले विश्वभर उच्च रक्तचापको न्यून चेतना दर विरुद्ध लड्न, विशेष गरी न्यून–मध्यम आय भएका क्षेत्रहरूमा सही रक्तचाप मापनलाई बढावा दिन र उच्च रक्तचापको बारेमा आम जनतालाई शिक्षित गर्नमा केन्द्रित छ । यो दिवस उच्च रक्तचापको पहिचान, गम्भीर जटिलताहरू, तिनीहरूको रोकथाम र व्यवस्थापनको बारेमा जानकारी दिनमा केन्द्रित छ ।
उच्च रक्तचाप अकाल मृत्युको सबैभन्दा ठूलो कारण हो । अहिलेको आधुनिक युगमा खराब जीवनशैली, असुरक्षित खानपान र शारीरिक क्रियाकलापको कमीका कारण उच्च रक्तचापको समस्या निरन्तर बढ्दै गएको छ । हाम्रो शरीरमा धमनीका पर्खालहरूमा रक्तचाप सामान्य सीमाभन्दा बढी हुँदा त्यसलाई उच्च रक्तचाप भनिन्छ । रक्तचाप १४०/९० पुगेमा उच्चरक्तचाप मानिन्छ । उच्च रक्तचाप नियन्त्रणमा समयमै ध्यान दिइएन भने यसले हृदयाघात र स्ट्रोकको जोखिम धेरै हदसम्म बढाउन सक्छ ।
त्यसैले विश्वभरका सचेत जनता मे १७ मा विश्व उच्च रक्तचाप दिवस मनाउन भेला हुन्छन् । यस विशेष दिनमा उत्सव, कार्यक्रम, ¥याली र प्रतियोगिताको माध्यमबाट सूचना तथा चेतना अभिवृद्धि गर्नुका साथै उच्च रक्तचापबाट बच्ने उपायबारे छलफल गरिन्छ । उच्च रक्तचाप अकाल मृत्युको प्रमुख कारण पनि हो । त्यसैले विश्व उच्च रक्तचाप दिवसको उद्देश्य उच्च रक्तचापको व्यापकता, यसका लक्षण र यसबाट बच्न स्वस्थ जीवनशैली अपनाउनुपर्ने महत्वबारे जनचेतना जगाउनु हो । उच्च रक्तचापको प्रारम्भिक उपचारले धेरै व्यक्तिको जीवन बचाउन सकिन्छ ।
