गाजाका बालबालिकालाई पोलियो खोपको दोस्रो डोज प्रदान
२०८१, १ कार्तिक बिहीबार १४:४८ मा प्रकाशित
नेपाल हेल्थ न्युज, गाजा । गाजाका एक लाख ५० हजारभन्दा बढी बालबालिकाले दोस्रो चरणको अभियानको पहिलो दुई दिनमा मौखिक पोलियो खोपको आवश्यक दोस्रो डोज प्राप्त गरेका छन् ।
प्यालेस्टिनी क्षेत्रका केही भागमा इजरायली सैन्य कारबाही जारी राखे पनि १० वर्षमुनिका पाँच लाख ९० हजारभन्दा बढी बालबालिकाका लागि पोलियो खोप अभियानको दोस्रो चरण सोमबार सुरु भएको छ ।
मध्य गाजामा पोलियो खोपको दोस्रो डोज पाएका बालबालिकाको कूल सङ्ख्या एक लाख ५६ हजार नौ सय ४३ रहेको विश्व स्वास्थ्य सङ्गठन (डब्लुएचओ) का महानिर्देशक टेड्रोस अधानोम गेब्रेयससले जानकारी दिनुभयो ।
खोप अभियान आज पनि जारी छ । सोही क्रममा एक लाख २८ हजार एक सय २१ बालबालिकालाई भिटामिन ए खुवाइएको थियो । “हामी मानवीय युद्धविरामको निरन्तर सम्मानका लागि आह्वान गर्दछौँ । हामी युद्धविराम र शान्तिका लागि आह्वान गर्छौं,” गेब्रेयससले भन्नुभयो ।
गाजा पट्टीमा २५ वर्षमा पोलियोको पहिलो मामिला पुष्टि भएपछि खोप अभियान सुरु भएको हो ।
डब्लुएचओका प्रवक्ता तारिक जसरेभिकले मङ्गलबार पत्रकारहरूलाई भन्नुभयो– “सोमबार पहिलो दिन मध्य गाजामा करिब ९३ हजार डोज दिइएको थियो ।” रासस
