शिक्षिकाले लठ्ठीले हान्दा यूकेजीमा पढ्ने ६ वर्षीय विद्यार्थीको गुम्यो बायाँ आँखा
२०८१, २८ पुष आईतवार १२:०८ मा प्रकाशित
नेपाल हेल्थ न्युज, काठमाडौँ । पश्चिम नवलपरासीमा शिक्षिकाको कुटाइबाट यूकेजीमा पढ्ने एक विद्यार्थीले आँखा गुमाउनु परेको छ ।
गत मंसिर १८ गते पश्चिम नवलपरासीको प्रतापपुर गाउँपालिका–१ मा रहेको एच पाठशालाकी शिक्षिका सन्जु चौधरीले लठ्ठीले हान्दा यूकेजीमा पढ्ने ६ वर्षीय प्रशान्त चौधरीको बायाँ आँखा गुमेको हो ।
विद्यालय प्रशासनका अनुसार गत मंसिर १८ गते कक्षामा पढाइरहेका बेला दुई विद्यार्थीबीचको झगडा छुट्याउन लठ्ठीले हान्दा चौधरीको आँखामा लागेको थियो ।
घटनापछि विद्यालय प्रशासनले नै बालकलाई गोपीगन्ज बजारमा उपचारका लागि लगेको थियो । त्यहाँ उपचार सम्भव नभएपछि अभिभावकले परासी हुँदै रणअम्बिका आँखा अस्पताल भैरहवाबाट काठमाडौंको तिलगंगा आँखा अस्पताल पुर्याए । अस्पतालले मंसिर १९ गते शल्यक्रिया गरेर बाहिर निस्किएको नानीलाई भित्र त राखिदियो । तर चिकित्सकले नानी फुटेकाले बालकले आँखाले देख्न नसक्ने बताएको अभिभावक बताउँछन् ।
बालकको दाहिने आँखाले पनि राम्ररी देख्दैन । देब्रे आँखाको चोटले दाहिने आँखा पनि खोल्न र हेर्न नमिलेको हो । उपचारका लागि एक वर्ष लाग्ने जानकारी चिकित्सकबाट पाएका अभिभावकले हप्ताहप्तामा फलोअप गराइरहेका छन् ।
काठमाडौंमा उपचार गराएर फर्किएपछि मात्र बालकको बाबु नरेन्द्र चौधरीले पुस १६ गते इलाका प्रहरी कार्यालय बर्दघाटमा शिक्षिकाविरुद्ध उजुरी दिएको नवलपरासी पश्चिमका प्रहरी प्रवक्ता डिएसपी रेशम बोहराले बताउनुभयो । त्यसलगत्तै अनुसन्धान प्रक्रिया अघि बढाएको उहाँले जानकारी दिनुभयो ।
यस घटनामा प्रहरीले पुस १९ गते शिक्षिका सन्जुविरुद्ध अदालतबाट पक्राउ पुर्जी लिएको छ । तर, अहिले ती शिक्षिका फरार रहेको प्रहरीले जनाएको छ।
