स्वास्थ्य चौकीको भवनका लागि पचास लाखको जग्गा दान
२०७४, १२ चैत्र सोमबार ०६:३१ मा प्रकाशित
बनेपा नगरपालिका–१२ निवासी समाजसेवीद्वय जगन्नाथ केसी र पद्म केसीले स्थानीय महेन्द्रज्योति स्वास्थ्य चौकीको भवनका लागि एक रोपनी चारआना जग्गादान गर्नुभएको छ ।
स्थानीयवासीका अनुसार सो जग्गाको मूल्य करिब रु ५० लाख रहेको छ । उहाँहरुले नेपाल रेडक्रस सोसाइटी काभ्रे शाखामार्फत स्वास्थ्य चौकीका लागि जग्गादान गर्नुभएको हो ।
उहाँहरुले दान गर्नुभएको जग्गामा नेपाल रेडक्रस सोसाइटीले कोरियन रेडक्रसको आर्थिक एवं प्राविधिक सहयोगमा स्वास्थ्य चौकीको नयाँ प्री फ्याव भवन, स्वास्थ्यकर्मीका लागि आवश्यक आवास भवन निर्माण एवं उपकरणको सहयोग गरिदिएको छ ।
सोसाइटीका केन्द्रीय अध्यक्ष सञ्जय थापाले बनेपा नगरपालिकाका प्रमुख लक्ष्मीनरसिंह वादे श्रेष्ठलाई नवनिर्मित सो भवनको साँचो हालै हस्तान्तरण गर्नुभयो । भवन हन्तान्तरण समारोहमा प्रदेशसभा सदस्य वसुन्धरा हुमागाई सहित मेयर श्रेष्ठ र अध्यक्ष थापाले जग्गादाताद्वयलाई विशेष सम्मान गर्नुभएको थियो ।
सम्मानित जगन्नाथ केसीले मानवीय सेवाको सर्वाेच्च संस्थामार्फत मानवीय सेवाका लागि जग्गादान गर्नपाउनु आफ्नो लागि गौरव बनेको चर्चा गर्दै बाँच्नभन्दा बचाउन ठूलो, गर्नभन्दा गराउनु ठूलो रहेको विचार राख्नुभयो ।
महेन्द्रज्योति स्वास्थ्य चौकीका प्रमुख सिनियरअहेव राजेन्द्र फैजुले भवन अपांङ, महिलामैत्री बनेकामा खुशी व्यक्त गर्दै छिट्टै चौकीले प्रयोगशाला, बर्थिङ र टेन्टल सेवा सञ्चालनमा ल्याउने तयारी गरेको बताउनुभयो । रासस